Jaslarımızdı qollap-quwatlaw, olardıń baslamaları hám joybarların ámelge asırıwı ushın imkaniyatlar jaratıw boyınsha elimiz boylap keń kólemli jumıslar ámelge asırılmaqta.

Ózbekstan Respublikası Prezidentiniń 14-fevral kúngi jaslar menen ushırasıwı dawamında jaslarımızǵa jańa imkaniyatlar esigi ashıldı. Atap aytqanda, joqarı oqıw ornın tamamlap atırǵan jasları ushın jeńilletilgen kreditler ajıratıw, isbilermen jaslarımızdıń jumısların jetilistiriw maqsetinde, jańa baslamalar, rejeler hám jeńillikler belgilendi.
Usı qararlardıń orınlanıwın támiyinlew, jaslarımızdıń bul boyınsha xabardarlıǵın arttırıw maqsetinde, «Áhmiyetli 90 kún» joybarı sheńberinde Shımbay rayonı politexnikumı pitkeriwshi jasları menen ushırasıw bolıp ótti.
Ushırasıwǵa Jaslar isleri agentligi Shımbay rayonlıq Jaslar isleri bólimi baslıǵı A.Genjebaev qatnasıp, olar menen tikkeley sáwbetlesti.
Ilajda pitkeriwshi jaslar óz sorawlarına juwap alıw menen bir qatarda, jańa joybar hám isbilermenlik ideyaların usınıp, olardıń bul usınısları Shımbay rayonlıq Jaslar isleri bólimi tárepinen qızǵın qollap-quwatlandı.
Sonday-aq, usı kúni rayonda «Áhmiyetli 90 kún» joybarı sheńberinde jaslar arasında «Bilim ring» intellektuallıq oyını hám voleybol boyınsha jarıs shólkemlestirildi.
Voleybol boyınsha ótkerilgen jarıs juwmaǵında, birinshi orındı Taza jol elatı jasları iyelegen bolsa, sıylı ekinshi hám úshinshi orınlar Keńes hám Qosterek awıl puqaralar jıyını jaslarına nesip etti.

Adilbay Orazov,
Qaraqalpaqstan xabar agentligi sholıwshısı.