Ekologiyalıq qáwiplerdiń aldın alıw – bul qorshaǵan ortalıqqa tásir etiwshi unamsız faktorlardı azaytıw yaki pútkilley saplastırıwǵa qaratılǵan áhmiyetli wazıypa.

Amerika Qurama Shtatlarınıń Vashington qalasında bolıp ótken Global ekologiyalıq fond (GEF) keńesiniń 69-májilisinde ekologiya, qorshaǵan ortalıqtı qorǵaw hám klimat ózgeriwi ministri Aziz Abduhakimov ta qatnastı. A.Abduhakimovtıń bayanatına bola, mámleketimizde ekologiyalıq qáwip-qáterlerge qarsı gúresiw baǵdarında bir qatar ilajlar ámelge asırılmaqta. Atap aytqanda, Aral teńiziniń qurıǵan ultanında keń kólemli toǵaylastırıw kampaniyası alıp barılmaqta.
Atap ótilgenindey, búgingi kúnge shekem 2 million gektar maydan jasıl aymaqqa aylandırılǵan. “Jasıl mákan” ulıwma milliy joybarı sheńberinde jasıl aymaqlardı 30 procentke shekem arttırıw maqset etilgen bolıp, hár jılı 200 million túp terek egilmekte. 2030-jılǵa barıp “jasıl” energiyanıń úlesin 54 procentke jetkeriw rejelestirilgen. Qayta tikleniwshi energiya hám shıǵındısız transportqa ótiw xoshametlenetuǵını jolǵa qoyılǵan.
Bunnan tısqarı, BMSh Bas Assambleyasınıń bir qatar rezolyuciyaları, sonıń ishinde, 2027-2036-jıllar aralıǵında toǵay hám jerlerdi tiklewge baylanıslı rezolyuciya alǵa qoyılmaqta.
Keńeste 2026-jılı GEFtiń 8-assambleyası hám GEF Keńesiniń 71-májilisin Samarqandta ótkeriw haqqında qarar qabıl etildi. Óz gezeginde, Aziz Abduhakimov Ózbekstan Respublikası húkimeti atınan tereń minnetdarshılıq bildirip, GEF járdeminde Ózbekstannıń ekologiyalıq kún tártibin qáliplestiriwde áhmiyetli jetiskenliklerge erisilgenin hám birge islesiwdi dawam ettiriwge úmit bildiretuǵının aytıp ótti.
– Oraylıq Aziya elege shekem klimat ózgeriwi, suw jetispewshiligi hám jer degradaciyası qáwpine oǵada tásirsheń region bolıp qalmaqta, – deydi Aziz Abduhakimov. – 2026-jıldaǵı GEF Assambleyası bul máselelerge itibar qaratıw, qarjı jumsaw, bilimler almasıw hám turaqlılıqtı bekkemlew ushın áhmiyetli maydan bolıp xızmet etedi. Biz sammit sheńberinde birge islesiwshi mámleketler menen regionallıq birge islesiwdi kúsheytiw, klimat turaqlılıǵın arttırıw hám biokóptúrlilik joǵalıwınıń aldın alıwǵa umtılmaqtamız.

ÓzA