Ishki isler ministrligi «Qáwipsiz qala» sistemaların rawajlandırıw orayı hám Muhammad al-Xorezmiy atındaǵı Tashkent málimleme texnologiyaları universiteti arasında birge islesiw memorandumına qol qoyıldı.

Onda «Qáwipsiz qala» sistemaların rawajlandırıw tarawında kadrlar tayarlaw boyınsha birge islesiw, sırt elli ekspertler menen tıǵız baylanıslardı jolǵa qoyıw, universitet professor-oqıtıwshıları tárepinen belgili baǵdarlarda qánigeligin arttırıw kursların shólkemlestiriw, xalıqaralıq kólemdegi ekspertlerdiń qatnasıwında lekciyalar shólkemlestiriw sıyaqlı bir qatar máseleler dodalandı.
Sonday-aq, «Qáwipsiz qala» orayınıń direktorı U.Kulanov hám TATU rektorı B.Mahkamov universitette ámelge asırılıp atırǵan jumıslar, studentler ushın jaratılǵan sharayatlar, zamanagóy usılda úskenelengen oqıw xanaları menen tanıstı.
Ushırasıw sońında tarmaq hám sistema administratorlıǵı hám málimleme qáwipsizligi máselelerinde kadrlardı jetkerip beriw hám ishki isler uyımların sanlastırıwda «sanlı jámáát»ti qáliplestiriw, birgelikte tarawǵa baylanıslı qollanba, mobil qosımshalar islep shıǵıw, izertlew hám joybarlar ústinde izleniwler alıp barıwǵa kelisip alındı.

U.Qurbonov, ÓzA