9-iyun kúni Kóksaray rezidenciyasında Ózbekstan Respublikası Prezidenti Shavkat Mirziyoev hám Slovakiya Respublikası Bas ministri Robert Ficonıń sóylesiwleri bolıp ótti.
Ózbekstan hám Slovakiya arasındaǵı ámeliy birge islesiwdi jáne de rawajlandırıwdıń áhmiyetli máseleleri kórip shıǵıldı.
Ushırasıw aldınan mámleketimiz basshısı bul sapar etiw kóp táreplemeli Ózbekstan-Slovakiya qatnasıqları tariyxında sapa jaǵınan jańa basqıshtı baslap beretuǵının ayrıqsha atap ótti.
Birge islesiw barlıq baǵdarlarda jedel rawajlanıp atırǵanı qanaatlanıwshılıq penen atap ótildi. Sırtqı isler ministrlikleri dárejesinde konstruktivlik siyasiy sóylesiwler jolǵa qoyıldı, isbilermenlik hám gumanitarlıq almasıwlar jedellesti.
Tovar almasıw artıp barmaqta. May ayında Húkimetleraralıq komissiyanıń birinshi májilisi nátiyjeli ótkerildi. Kooperaciyanıń bir qatar jańa baǵdarları hám joybarları ústinde jumıs alıp barılmaqta.
Zamanagóy qáwip-qáterler hám aldınnan aytıp bolmaytuǵın xalıqaralıq jaǵdaydı esapqa alıp, sırtqı siyasiy uyımlar, sonıń ishinde, Evropa institutları menen sheriklik sheńberinde sistemalı birge islesiw, muwapıqlastırıw hám qollap-quwatlaw áhmiyetli ekenligi atap ótildi.
Tovar almasıwdı kóbeytiw, bárinen burın, óz-ara jetkerip berilip atırǵan ónimlerdiń túrlerin keńeytiw máselelerine ayrıqsha itibar qaratıldı.
Ózbekstannan toqımashılıq, awıl xojalıǵı, elektrotexnika, ximiya ónimleri, polimerler, Slovakiyadan bolsa kauchuk, avtomobil bólekleri, farmacevtika hám basqa da sanaat tovarların jetkerip beriw solardıń qatarına kiredi.
Texnikalıq jaqtan tártipke salıw hám metrologiya tarawlarında qol qoyılatuǵın kelisimlerdi ámelge asırıw sheńberinde texnikalıq tosqınlıqlardı saplastırıw hám kvant etalonı laboratoriyasın iske qosıw áhmiyetli ekenligi atap ótildi.
Slovakiyanıń jetekshi kompaniyaları menen sanaat kooperaciyası boyınsha keń kólemli baǵdarlamanı tayarlaw, sonıń ishinde, agrosanaat kompleksi, avtomobiller ushın awısıq bóleklerdi lokalizaciyalaw, farmacevtika ónimlerin islep shıǵarıw, “jasıl” energetika hám turizm joybarların ámelge asırıw boyınsha kelisimge erisildi.
Sanlı sheshimlerdi engiziw hám startap investiciyalar tarawında úlken imkaniyatlar bar. Usı mániste, IT startapların akseleraciyalaw boyınsha birgeliktegi venchur fondın shólkemlestiriw máselesi kórip shıǵıldı.
Sonday-aq, birgeliktegi joybarlardı qollap-quwatlaw ushın bar qarjı qurallarınan keńnen paydalanıw usınıs etildi.
Gumanitarlıq tarawda bilimlendiriw hám akademiyalıq almasıwdı rawajlandırıwdan eki tárep te mápdar ekeni tastıyıqlandı. Birgeliktegi izertlew baǵdarlamaların, sonıń ishinde, Bratislavadaǵı Komenskiy universitetiniń qatnasıwında jolǵa qoyıw boyınsha kelisimge erisildi.
Tárepler óz-ara kórgizbeler, kino kórsetiwler, koncertler, sonday-aq, muzey isi tarawındaǵı joybarlardı ótkeriwdi názerde tutatuǵın Mádeniyat tarawında birge islesiw baǵdarlamasın qabıl etiwge kelisip aldı.
Shólkemlestirilgen miynet migraciyası máselelerine ayrıqsha itibar qaratıldı. Slovakiya tárepi bul tarawda sistemalı birge islesiwdi jolǵa qoyıwdan mápdar ekeni atap ótildi.
Xalıqaralıq áhmiyetke iye máseleler, sonıń ishinde, kóp tárepleme maydanlarda óz-ara qollap-quwatlaw boyınsha da pikir alıstı.
Qabıl etilgen qarar hám kelisimlerdi óz waqtında hám sapalı ámelge asırıw maqsetinde eki mámleket húkimetleri tárepinen keń kólemli “jol kartası” qabıl etiliwi haqqında kelisip alındı.
ÓzA