Búgin paytaxtımızdaǵı «CAEx Uzbekistan» xalıqaralıq kórgizbeler orayında Ózbekstan – AQSh biznes-forumı bolıp ótpekte.

Onda eki tárep rásmiyleri, jergilikli hám sırt el qánigeleri, isbilermen topar wákilleri hám ekspertler qatnaspaqta.
Forumda shıǵıp sóylegen Ózbekstan Respublikası Bas ministriniń orınbasarı Jamshid Xwjaev elimizde ámelge asırılıp atırǵan keń kólemli ekonomikalıq reformalar, investiciyalıq ortalıqtı jaqsılawǵa qaratılǵan ilajlar hám olardıń xalıqaralıq birge islesiwdi bekkemlewdegi ornı haqqında aytıp ótti.
Atap ótiliwinshe, sońǵı jılları Ózbekstan-AQSh sawda-ekonomikalıq qatnasıqları izbe-iz rawajlanıp, bir qatar iri joybarlar tabıslı ámelge asırılmaqta.
Amerika-Ózbekstan sawda palatasınıń baslıǵı Kerolin Lemm de forum sheńberindegi shıǵıp sóylegen sózinde mámleketimizde jaratılǵan qolaylı investiciyalıq ortalıq, jeke menshik sektordı qollap-quwatlaw hám ekonomikalıq ashıq-aydınlıq AQSh kompaniyaları ushın áhmiyetli imkaniyatlar jaratıp atırǵanın atap ótti. Onıń pikirinshe, bunday biznes-forumlar eki mámleket arasındaǵı isbilermenlik baylanısların jáne de bekkemlew, jańa baǵdarlarda birge islesiwdi keńeytiw ushın nátiyjeli platforma wazıypasın atqarmaqta.
Ilaj sheńberinde energetika, agrosanaat, málimleme texnologiyaları, sanaat, densawlıqtı saqlaw hám bilimlendiriw sıyaqlı tarawlarda birge islesiw perspektivaları dodalandı.
Forum qatnasıwshılarınıń atap ótiwinshe, bul biznes-forum eki mámleket arasındaǵı ekonomikalıq baylanıslardı bunnan bılay da bekkemlew, isenim hám óz-ara paydaǵa tiykarlanǵan jańa sheriklikti qáliplestiriwde úlken áhmiyetke iye.
Biznes-forum óz jumısın dawam ettirmekte.

Nasiba Ziyodullaeva, ÓzA