Múnásibet

Ózbekstan Respublikası Oliy Majlisi Senatı Kengashiniń 2025-jıl 6-maydaǵı “Xalıq deputatları jergilikli Keńesleri tárepinen Keńes tekseriwin ótkeriw tártibin tastıyıqlaw haqqında”ǵı qararına tiykarlanıp, Xalıq deputatları jergilikli Keńesleri tárepinen Keńes tekseriwin ótkeriw tártibi tastıyıqlandı.

Keńes tekseriwi — tiyisli aymaqtıń qáwipsizligine, turaqlı rawajlanıw tiykarlarına unamsız tásir kórsetiwi múmkin bolǵan, insan huqıqları menen erkinliklerine, jámiyet hám mámleket máplerine qáwip tuwdıratuǵın faktler menen waqıyalardı úyreniw maqsetinde ótkeriliwi múmkin bolǵan jergilikli Keńestiń ayrıqsha tekseriw túri bolıp esaplanadı.
Keńes tekseriwin ótkeriw nızamlılıq, qalıslıq, ashıq-aydınlıq, insan huqıqları menen erkinliklerin húrmet etiw principlerine tiykarlanadı.
Operativ-izlew jumısın ámelge asırıwshı uyımlardıń, sorastırıw hám tergew uyımlarınıń, sudlardıń is júrgiziwindegi belgili islerdi hám materiallardı, sonday-aq, orınlaw is júrgiziw hám notarial is júrgiziwdiń belgili materialların kórip shıǵıw menen baylanıslı jumıs Keńestiń tekseriw obekti bolıwı múmkin emes.
Fizikalıq hám yuridikalıq táreplerdiń múrájatları, ǵalaba xabar qurallarında yamasa internet tarmaǵında járiyalanǵan maǵlıwmatlar, qadaǵalawshı hám huqıq qorǵaw uyımlarınıń maǵlıwmatları, deputatlardıń usınısları Keńes tekseriwin ótkeriw ushın tiykar boladı.
Deputat (yamasa deputatlar toparı) — jergilikli Keńes deputatlarınıń keminde úshten bir bólegi qollap-quwatlaǵan jaǵdayda, jergilikli Keńestiń turaqlı komissiyası, jergilikli Keńestegi partiya toparı, wálayat, rayon, qala hákimi, Oliy Majlis palataları, Ministrler Kabineti jergilikli Keńeske Keńes tekseriwin ótkeriw haqqında usınıs kirgiziwi múmkin.
Jergilikli Keńes Keńes tekseriwi juwmaqları boyınsha lawazımlı shaxstı juwapkershilikke tartıw, olardı lawazımınan azat etiw haqqında tiyisli mámleketlik uyımlarǵa, Ministrler Kabineti yamasa Oliy Majlis Senatına usınıslar kirgiziwi, tiyisli mámleketlik uyımlar hám shólkemlerge nızamshılıq hújjetleriniń, mámleketlik baǵdarlamalardıń orınlanıwı, ózlerine júklengen wazıypalar hám funkciyalardıń ámelge asırılıwı nátiyjeliligin arttırıwǵa qaratılǵan ilajlar kóriw boyınsha usınıslar kirgiziwi múmkin.
Sonday-aq, Keńes tekseriw juwmaqları boyınsha tayarlanǵan materiallardı wákillikli mámleketlik uyımlarǵa óz wákilliklerine muwapıq kórip shıǵıw ushın jiberiwi, puqaralardıń huqıqları hám nızam menen qorǵalatuǵın máplerin buzıw jaǵdayları yamasa nızam hújjetlerin buzıwdıń basqa jaǵdayları málim bolıp qalǵan jaǵdayda olarǵa tezlik penen shek qoyıw ilajların kóriw talabı menen tiyisli mámleketlik uyımlarǵa hám shólkemlerge jáne lawazımlı shaxslarǵa múrájat etiwi, Keńes tekseriw nátiyjelerin járiyalawı múmkin.
Bul qarar menen óz gezeginde jergilikli Keńesler, olardıń turaqlı komissiyaları hám partiya toparlarınan jáne de belsendi bolıwı talap etiledi.

Maxmud Esengeldiev,
Xalıq deputatları Shomanay rayonlıq Keńesiniń deputatı.
Qaraqalpaqstan xabar agentligi.