Ózbekstan Respublikası Prezidenti Shavkat Mirziyoevtiń mirát etiwine bola Slovakiya Respublikası Bas ministri Robert Fico rásmiy sapar menen mámleketimizde bolıp turıptı.

Joqarı mártebeli miyman 9-iyun kúni Ózbekstan Respublikası Bas ministriniń orınbasarı Jamshid Xwjaev penen birgelikte «Jańa Ózbekstan» baǵına barıp, Ǵárezsizlik monumentine gúl qoydı.
Kompleks penen qısqasha tanısıw tiykarında Slovakiya delegaciyasınıń wákillerine usı ansambl mazmunı hám arxitekturalıq sheshimleri haqqında maǵlıwmat berildi.
“Jańa Ózbekstan” baǵı hám Ǵárezsizlik monumenti ǵárezsizligimizdiń otız jıllıǵına baǵıshlap qurılǵan. Úsh mıń jıldan aslam dáwir – ana Watanımız aymaǵındaǵı milliy mámleketshilik tariyxınıń tamırları sonshelli tereń. Monumentke itibar qaratqan adam mine, usı awır ótmishtiń kórkem súwretleniwine gúwa boladı.
Joqarı mártebeli miymanlar, rásmiy sırt el delegaciyalarınıń elimizge saparı sheńberinde bul jerdegi monumentke gúl qoyıw dástúrge aylanǵan. Delegaciya aǵzaları komplekste sáwlelendirilgen ulamalar, ullı sárkarda hám jáhángirler, jadid babalarımızdıń tulǵalarına ayrıqsha itibar qarattı. Tınıshlıq, erkinlik, jaqsılıq tımsalı bolǵan Humo qusı súwreti komplekstiń misli gúltajı sıyaqlı kórinetuǵını atap ótildi.
Sapar baǵdarlamasına muwapıq, Tashkent qalasında joqarı dárejedegi sóylesiwler bolıp ótedi, Ózbekstan – Slovakiya kóp táreplemeli birge islesiwin bunnan bılay da rawajlandırıw máseleleri dodalanadı.

Behruz XUDOYBERDIEV,
Rustam NAZARMATOV (foto), ÓzA