Ózbek xalqınıń, sonıń menen birge, kóp millionlı futbol ıqlasbentleriniń uzaq jıllıq ármanı orınlandı.

Anıǵıraq aytatuǵın bolsaq, Aziya kontinentinde futbol boyınsha Jáhán chempionatınıń 3-saylap alıw basqıshınıń 9-turında Ózbekstan saylandı komandası BAÁ saylandı komandasına qarsı 0:0 esabında teń nátiyje kórsetti. Bunıń menen saylandı komandamızdıń ochkoları 18 ge jetip, mámleket tariyxında birinshi márte Jáhán chempionatına jollamanı qolǵa kirgizdi. Bul jeńis barlıq watanlaslarımızdı sheksiz quwandırdı. Búgin xalqımız shın júrekten futbolshılarımız benen maqtanbaqta.
Futbolımız tariyxında jańa bet ashqan Temur Kapadze basshılıǵındaǵı saylandı komandamız aǵzaların Islam Kárimov atındaǵı Tashkent xalıqaralıq aeroportında húkimet aǵzaları, sportımız juwapkerleri, ata-analar, trenerler, keń jámiyetshilik wákilleri, taraw pidayıları saltanatlı kútip aldı.
Uzaq kútilgen minutlar óz juwmaǵına jetip, júzleri jarqın, basların maqtanıshlı kótergen futbolshılarımız kózge taslana basladı.
– Bul kúndi hám futbolshı, hám trener sıpatında kóp kútkenmen, – deydi Ózbekstan milliy saylandı komandasınıń bas treneri Temur Kapadze. – Hesh gúmansız, bul jeńislerimizdiń tiykarında bárinen burın xalqımızdıń isenimi hám pátiyası jatır. Kúni keshe Prezidentimiz Shavkat Mirziyoev jámáátimiz aǵzaların telefon arqalı qutlıqlaǵanı bizdi oǵada quwandırdı. Bizge jollaǵan qutlıqlawındaǵı «Hesh gúmansız, milliy sportımız jılnamasına altın háripler menen jazılatuǵın bunday jarqın nátiyje elimizdegi millionlaǵan futbol ıqlasbentleri, pútkil xalqımızdıń neshe jıllıq ármanı edi» degen sózleri ózim sıyaqlı barlıq komandamız aǵzaların ruwxlandırdı. Xalqımızdıń eń ullı ármanlarınan birin ámelge asırǵanımızdan quwanıshlımız. Endi biziń juwapkershiligimiz jáne de artadı hám 2026-jılǵı Jáhán chempionatında da múnásip qatnasıwǵa bar kúsh-ǵayratımızdı jumsaymız.
Álbette, bul jeńis mámleketimizde sońǵı jıllarda sport tarawı, atap aytqanda, ózbek futbolına qaratılıp atırǵan itibardıń ámeliy kórinisi bolıp esaplanadı. Futboldı ǵalaba en jaydırıw, jas áwlad arasında sportqa qızıǵıwshılıqtı arttırıw, xalıqaralıq jarıslarda múnásip qatnasatuǵın saylandı komandalardı qáliplestiriw maqsetinde sistemalı jumıslar ámelge asırıldı.
– Ótken jılı Olimpiada saylandı komandamız quramında «Parij-2024» Olimpiada oyınlarına jollamanı qolǵa kirgizip, tariyxıy nátiyje kórsetken bolsaq, bıyıl milliy saylandı komandamız quramında Jáhán chempionatına jol aldıq hám xalqımızdıń ázeliy ármanın ámelge asırdıq, – deydi Ózbekstan milliy saylandı komandası aǵzası Abbosbek Fayzullaev. – Xalqımızdıń neshe jıllıq ármanı orınlandı. Buǵan belgili dárejede óz úlesimdi qosqanımnan quwanıshlıman. Mámleketimizde sportshılarǵa jaratılıp berilip atırǵan keń imkaniyatlar hám biz, jaslarǵa qaratılǵan ayrıqsha itibar nátiyjesinde úlken sheklerdi qolǵa kirgizbekte. Bunıń ushın Prezidentimiz hám xalqımızǵa óz minnetdarshılıǵımızdı bildiremiz.

Futbol boyınsha Aziya kontinentinde Jáhán chempionatı 3-saylap alıw basqıshınıń 9-tur oyınlarınıń juwmaǵına bola, «A» toparındaǵı jaǵday bir qansha ayqınlastı. Toparda Iran 20 ochko menen birinshi bolıp baratırǵan bolsa, Ózbekstan saylandı komandası 18 ochko toplap, ekinshi orındı iyeledi. Bul saylandı komandalar múddetinen aldın Jáhán chempionatına jollamanı qolǵa kirgizdi. BAÁ saylandı komandası 14 ochko menen úshinshi orında qaldı. Qatar 13 ochko menen 4-orındı bekkemledi. Qırǵızstan 7, KXDR 3 ochko menen keyingi orındı iyeledi.
Endi 10-iyun kúni Ózbekstan – Qatar, Qırǵızstan – BAÁ hám Iran – KXDR saylandı komandaları sońǵı tur ushırasıwların ótkeredi.
Esletip ótemiz, 2026-jılı AQSh, Kanada hám Meksika mámleketlerinde bolıp ótetuǵın futbol boyınsha jáhán chempionatında 48 komanda qatnasıwı belgilengen. Kontinentimizge tikkeley 8, kontinentler aralıq pley-off oyınları arqalı bolsa bir orın ajıratılǵan.
Aziya kontinenti ushın Jáhán chempionatınıń 3-saylap alıw basqıshında 18 komanda úsh toparǵa bólindi hám olar dógerek sistemasında (úy-sapar) bellespekte. Hár bir topardan eń jaqsı eki orındı iyelegen saylandı komanda 2026-jılǵı Jáhán chempionatına tikkeley jollama aladı.
Aziya saylap alıw toparlarında úshinshi hám tórtinshi orınlardı iyelegen 6 saylandı komanda juwmaqlawshı basqıshta hár biri úsh komandadan ibarat eki toparǵa bólingen halda dógerek formatında gúres alıp baradı.
Aziya pley-off basqıshında eń jaqsı eki orındı iyelegen komandalar «JCH-2026» jollamasına iye boladı. Hár eki toparda ekinshi orındı iyelegen komandalar kontinentler aralıq pley-offta AFK atınan qatnasatuǵın komandanı anıqlaw ushın óz-ara oyın ótkeredi.
Ilajda Ózbekstan Respublikası Bas ministri A.Aripov qatnastı.

Twlqin RWZIEV,
Javohir TOShXWJAEV,
ÓzAnıń xabarshıları