Húrmetli watanlaslar!

Siz, ázizlerdi, barlıq mómin-musılman watanlaslarımızdı, pútkil xalqımızdı ullı hám qádirli áyyyam – Qurban hayıtı menen shın kewlimnen qızǵın qutlıqlap, ózimniń joqarı húrmetim hám jaqsı tileklerimdi bildiriwden oǵada quwanıshlıman.

Pútkil islam úmmeti ushın qádirli bolǵan bul ullı bayram – Iyd al-Adhoni el-xalqımız benen birgelikte tınısh hám tatıw ortalıqta kútip alıp atırǵanımız ushın, bárinen burın, mehriyban hám qúdiretli Alla taalaǵa esapsız shúkirler aytamız.

Sózsiz, keyingi jılları Jańa Ózbekstanda sociallıq, xalıqshıl mámleket qurıw, onıń ruwxıy tiykarların bekkemlew hám tásirsheńligin arttırıwda muqaddes islam dini, onıń tiykarǵı bayramlarınan biri bolǵan Qurban hayıtı da áhmiyetli rol atqarmaqta.

Ásirese, bul bayramnıń adamgershilik, awızbirshilik, saqawat hám ullılıq sıyaqlı pazıyletleri elimizde “Insan qádiri ushın, insan baxıtı ushın” degen iygilikli ideya tiykarında ámelge asırılıp atırǵan keń kólemli reformalarǵa sáykes túrde, xalıqtıń járdemge mútáj qatlamların qollap-quwatlaw, kekseler, jaslar hám hayal-qızlarǵa ayrıqsha ǵamxorlıq kórsetiw, kámbaǵallıqtı qısqartıwǵa qaratılǵan baǵdarlamalarımızdıń nátiyjesin arttırıwǵa xızmet etip atırǵanın ayrıqsha atap ótiw orınlı.

Áziz doslar!

Búgingi kúnde elimizde túrli milletler hám diniy konfessiyalar arasındaǵı awızbirshilikti bekkemlew, hújdan erkinligin támiyinlew, diniy-aǵartıwshılıq miyrasımızdı qásterlep-saqlaw, jas áwladtı milliy hám ulıwma insanıylıq qádiriyatlar ruwxında tárbiyalaw boyınsha úlken jumıslar ámelge asırılmaqta.

Bul haqqında sóz etkende, islam dininiń iygilikli principlerin tereń úyreniw, ullı tariyxımız hám mádeniyatımızdıń dúrdanaların, belgili ulamalarımızdıń bay miyrasın jıynaw hám keńnen úgit-násiyatlawǵa ayrıqsha itibar qaratılıp atırǵanın atap ótiw kerek. Sonıń ishinde, áyyemgi Shıǵıs ájayıbatı – Samarqand qalası 2025-jılı islam mádeniyatı paytaxtı, dep járiyalandı, ullı watanlasımız Imam Maturidiydiń 1155-jıllıq tuwılǵan kúni elimiz boylap keńnen belgilenbekte, Imam Buxariy, Imam Maturidiy hám Imam Termiziy xalıqaralıq ilimiy-izertlew orayları qatarına, usı jılı Buxara qalasında óz jumısın baslaytuǵın Bahauddin Naqshband ilimiy-izertlew orayı da qosıldı.

Paytaxtımız Tashkent qalasında qurılıp atırǵan Islam civilizaciyası orayı ilimiy-ruwxıy baǵdardaǵı úlken hám biybaha joybar sıpatında elimiz hám xalıqaralıq jámiyetshilikte úlken qızıǵıwshılıq oyatpaqta. Bul ullı orın kóp mıń jıllıq áyyemgi tariyxımız, bay hám biytákirar milliy mádeniyatımızdıń ayqın tımsalı sıpatında Jańa Ózbekstan turmısındaǵı oǵada áhmiyetli waqıyaǵa aylanadı, dep isenemen.

Húrmetli watanlaslar!

Usı baxıtlı kúnlerde 15 mıń watanlasımız muqaddes haj zıyaratın orınlamaqta. Jaqsı duwa hám niyetler qabıl bolatuǵın mine usınday nurlı demlerde olardı da Qurban hayıtı menen qızǵın qutlıqlap, Jaratqannan elimizge saw-salamat qaytıp keliwin soraymız.

Húrmetli hajılarımız jámiyetimizde awızbirshilik, shańaraq hám máhállelerimizde mehir-múriwbet ortalıǵın jáne de bekkemlew, jaslarımızdıń tárbiyasın kúsheytiw, olardı ilim-aǵartıwshılıqqa, zamanagóy kásip-ónerlerdi iyelewge, Watan qorǵawshısı bolıwǵa úgit-násiyatlaw, mútáj insanlarǵa járdem beriwde ayrıqsha órnek hám úlgi kórsetedi, dep úmit etemiz.

Kewillerimiz quwanıshqa tolǵan usı payızlı kúnlerde sırt mámleketlerde bolıp turǵan watanlaslarımızdı da búgingi ullı áyyyam menen shın kewlimnen qutlıqlap, olarǵa saw-salamatlıq, baxıt hám áwmet tileymiz.

Dúnyanıń alıs-jaqın úlkelerindegi musılman úmmetin de qızǵın qutlıqlap, olardıń xalıqları menen mámleketlerine tınıshlıq, rawajlanıw hám abadanlıq tilep qalamız.

Áziz hám húrmetli watanlaslar!

Házirgi kúnde dúnya qanshelli quramalı hám qáweterli bolıp atırǵanın bárshemiz kórip turmız. Bunday keskin sharayatta elimizde tınıshlıq, óz-ara húrmet hám tatıwlıq ortalıǵın saqlap, barlıq taraw hám tarmaqlarda pidákerlik penen miynet etip, gózlegen joqarı maqsetlerimizge erise alamız.

Álbette, óz tariyxında qanshadan-qansha sınaq hám mashaqatlardan múnásip ótken márt hám ullı xalqımız buǵan hár tárepleme uqıplı.

Bul jolda el-jurtımızǵa tiyisli miyrim-shápáát, óz-ara birlik hám tatıwlıq biz ushın sheksiz kúsh-qúdiret dáregi bolıp xızmet etedi, dep isenemen.

Siz, ázizlerdi muqaddes Qurban hayıtı menen jáne bir márte qızǵın qutlıqlap, bársheńizge tınıshlıq-paraxatshılıq, densawlıq, shańaraqlarıńızǵa qut-bereket tileymen.

Qutlı áyyyam bárshemizge múbárek bolsın!

 

  Shavkat Mirziyoev,

Ózbekstan Respublikası Prezidenti