Hár jılı 5-iyun sánesi dúnya júzi boylap pútkil jer júzilik qorshaǵan ortalıqtı qorǵaw kúni sıpatında keńnen belgilenedi. Bul sáne biziń elimizde deekologiyalıq mádeniyattı arttırıw, qorshaǵan ortalıqqa itibarlı qatnastı qáliplestiriw maqsetinde keń túrde beliglenip kelinbekte.

Taxtakópir rayonındaǵı Dáwqara awıl puqaralar jıyını aymaǵında jaylasqan «Qaratereń» ekoturizm kompleksinde usı sáne hám «2025-jıl – Qorshaǵan ortalıqtı qorǵaw hám «jasıl» ekonomika jılı» múnásibeti menen «Taza aymaq» akciyası bolıp ótti.
Akciyaǵa Ózbekstan ekologiyalıq partiyası belsendileri, student- jaslar hám aymaq turǵınları qatnastı.
Ózbekstan ekologiyalıq partiyası Qaraqalpaqstan Respublikası partiya shólkemi Keńesi Atqarıw komitetiniń baslıǵı A.Begimova shıǵıp sóylep, sońǵı jılları elimizde Prezidentimizdiń basshılıǵında aymaqlarda ekologiyalıq tazalıqtı támiyinlew, qorshaǵan ortalıqtı qorǵaw boyınsha islenip atırǵan jumıslar hám onıń unamlı nátiyjeleri haqqında keń túrde aytıp ótip, ilaj qatnasıwshıların ana-Tábiyatımızdı taza halında saqlaw hám biokóptúrlilikti qorǵawǵa shaqırdı.
Ilajda qatnasıwshılar tárepinen «Qaratereń» ekoturizm kompleksiniń átirapı hár qıylı plastik shıǵındılardan tazalanıp, arnawlı orınlarǵa aparıp taslandı.

Adilbay Orazov,
Qaraqalpaqstan xabar agentligi sholıwshısı