Birlesken Milletler Shólkemi Azıq-awqat hám awıl xojalıǵı shólkemi (FAO) Aralboyı regionında úlken áhmiyetke iye gezektegi baslamanı ámelge asırdı.

Xalıqaralıq struktura hawanıń sapasın, jer hám suw resursların basqarıwdı jaqsılawǵa baǵıshlanǵan birgeliktegi baǵdarlama sheńberinde Qaraqalpaqstan Respublikasınıń úsh rayonında altı zamanagóy meteorologiyalıq stanciya ornatıldı.
Bul aldınǵı monitoring sistemaları temperatura, jawın-shashın muǵdarı, ıǵallıq, samal tezligi hám quyash nurlanıwı sıyaqlı áhmiyetli klimat kórsetkishlerin úzliksiz baqlap baradı hám real waqıttaǵı maǵlıwmatlardı usınadı.
Baslama Moynaq, Qońırat hám Taxtakópir rayonlarındaǵı xalıqqa tikkeley payda keltiredi.
Baǵdarlama ekologiyalıq hám sociallıq-ekonomikalıq jaqtan ázzi qatlam, ásirese, hayal-qızlar, balalar hám jaslardı qollap-quwatlawǵa qánigelesken, sebebi olar regiondaǵı ekologiyalıq daǵdarıstan kóbirek jábir kóriwi múmkin.
– Bul meteorologiyalıq tarmaq Aralboyı aymaǵındaǵı klimat máselelerin túsiniw jolındaǵı áhmiyetli qádem bolıp esaplanadı, – dedi FAOnıń Ózbekstandaǵı wákili orınbasarı Sherzod Umarov. – Altı stanciyadan alınǵan maǵlıwmatlar bizge regionımız ushın eń nátiyjeli hám ilimiy tiykarlanǵan klimat strategiyaların jaratıw imkaniyatın beredi.
FAO hám BMSh Rawajlanıw baǵdarlamasınıń birgeliktegi baslaması bul baǵdardaǵı potencialdı arttırıwǵa xızmet etetuǵının atap ótiw kerek. Baǵdarlama ekosistema xızmetlerin basqarıw ámeliyatın jetilistiriw, ekologiyalıq degradaciyanı saplastırıwda innovaciyalıq sheshimlerdi alǵa qoyıw jolında zárúr bilim, qural hám resurslar menen támiyinleydi.
Bir sóz benen aytqanda, bul birge islesiw ekologiyalıq mashqalalarǵa kompleksli qatnas jasawdı támiyinlew, dúnyadaǵı ekologiyalıq mashqalalardı saplastırıwǵa xızmet etiwi menen áhmiyetli.

ÓzA