Usı jıl 5-mart kúni Ózbekstan Respublikası Prezidenti basshılıǵında ótkerilgen keńeytilgen májiliste belgilep berilgen wazıypalardıń óz waqtında hám nátiyjeli orınlanıwı, sonday-aq, korrupciyanıń aldın alıwǵa baǵdarlanǵan sistemalı qatnastıń jolǵa qoyılıwı – insan qádirin ulıǵlaytuǵın reformalardıń tiykarǵı baǵdarı sıpatında kózge taslanbaqta.

Beruniy rayonında da korrupciyaǵa qarsı gúresiw máselelerine baǵıshlanǵan májilis bolıp ótti. Májiliske rayon hákiminiń orınbasarı D.Karimov basshılıq etti. Onda Qaraqalpaqstan Respublikası Ministrler Keńesi ishki qadaǵalaw bóliminiń baslıǵı B.Matmuratov, respublika prokuraturasınıń juwaplı xızmetkeri, rayon hákiminiń tarawlar boyınsha orınbasarları, tiyisli bólimlerdiń basshıları hám qánigeler, sonday-aq, kárxana hám shólkemlerdiń basshıları qatnastı,-dep maǵlıwmat beredi rayon hákimligi Málimleme xızmeti bóliminiń baslıǵı A.Urazova.
Májilis dawamında kún tártibindegi áhmiyetli máseleler dodalandı. Sonıń ishinde, ishki qadaǵalaw bóliminiń baslıǵı B.Matmuratov shıǵıp sóylep, aymaqta korrupciyalıq jaǵdaylardıń aldın alıw boyınsha alıp barılıp atırǵan jumıslar, olardıń nátiyjeliligi hám bar mashqalalar boyınsha hár tárepleme maǵlıwmat berdi.

Qaraqalpaqstan xabar agentligi