Ellikqala rayonında Baslamalı byudjet baǵdarlamasınıń 2025-jıl birinshi máwsimi sheńberinde ulıwma uzınlıǵı 5 kilometrge shamalas bolǵan jollar jańadan asfalt qaplaması menen támiyinlendi. Bul baslama máhálleler turǵınları ushın háreketti bir qansha jeńillestirdi hám transport qáwipsizligin támiyinlewge xızmet etpekte.

Ońlanǵan jollar qatarında Qırıqqızabad awıl puqaralar jıyınında jaylasqan “Usman Nasır” kóshesiniń 2 kilometr 530 metr bólegi ayrıqsha itibarǵa ılayıq. Sonday-aq, Kishi Gúldirsin máhállesi aymaǵındaǵı “Nawayı,” “Mustaqillik” hám “Kishi Gúldirsin” kósheleri boylap jámi 2 kilometr 342 metr jol ońlandı. Bul kósheler xalıqtıń kúndelikli háreketinde úlken áhmiyetke iye bolıp, jollarda ańsat hám qáwipsiz háreketleniwdi támiyinleydi, – dep maǵlıwmat beredi rayon hákimligi Málimleme xızmeti bólimi.
Baslamalı byudjettiń tiykarǵı ideyası – jergilikli xalıqtıń óz talapları tiykarında joybarlardı tańlap alıwı hám olardı ámelge asırıwda tikkeley qatnasıwı. Bul bolsa jergilikli basqarıwda ashıq-aydınlıqtı arttıradı, puqaralıq belsendiligin kúsheytip, xalıq penen qarım-qatnastı nátiyjeli shólkemlestiriwge xızmet etedi.
Bunday joybarlar tek ǵana orınlardaǵı infrastrukturanı jaqsılap qoymastan, al xalıqtıń turmıs sapasın arttırıwda úlken áhmiyetke iye.

Qaraqalpaqstan xabar agentligi