Nızam joybarına túsinik

Sırt elde miynet etip atırǵan Ózbekstan puqaralarınıń huqıqları menen nızamlı máplerin qorǵaw boyınsha keń kólemli jumıslar ámelge asırılmaqta. Atap aytqanda, sırt elde hújjetsiz qalıp ketken puqaralarımızǵa Watanǵa qaytıw gúwalıǵı hám pasportlar rásmiylestiriw, konsullıq dizimge alıw, Ózbekstannan hújjetler sorap alıw, turaqlı jasawǵa ruxsatnama rásmiylestiriw, sudlanbaǵanlıǵı haqqında maǵlıwmatnama alıw, aydawshılıq gúwalıqların almastırıw boyınsha bir qatar jumıslar ámelge asırılǵan.
Mámleketimizde ámelge asırılıp atırǵan reformalar sheńberinde migraciya tarawında mámleketlik basqarıw sisteması jetilistirilip, bul tarawdaǵı respublikalıq atqarıw hákimiyats uyımları jumısınıń tiykarǵı baǵdarları belgilep berilgenin atap ótiw zárúr. Sonıń ishinde, Kámbaǵallıqtı qısqartıw hám bántlik ministrligi janındaǵı Sırtqı miynet migraciyası agentligi saplastırılıp, Ministrler Kabineti janında Migraciya agentligi shólkemlestirildi. Sonday-aq, puqaralardı sırt elde miynet etiw ushın shólkemlesken tárizde jiberiw tarawında jeke menshik sektordıń qatnasıwı keńeytildi.
Endi migraciya processlerin basqarıw sistemasın jetilistiriwge qaratılǵan nızam joybarı menen Ministrler Kabineti janındaǵı Migraciya agentligi Ózbekstan Respublikasınan sırtta jumıs izlep atırǵan shaxslardı jumısqa ornalastırıw boyınsha jumıstı licenziyalaw, licenziya talapları hám shártlerine ámel etiliwin qadaǵalaw boyınsha wákillikli uyım etip belgilenbekte. Sonday-aq, Migraciya agentligine jeke menshik bántlik agentlikleri haqqındaǵı nızamshılıqtı buzǵanı ushın hákimshilik tásir ilajların qollanıw wákilligi berilmekte.
Bunnan tısqarı, Ózbekstan Respublikasınan sırtta jumıs izlep atırǵan shaxslardı jumısqa ornalastırıw boyınsha kórsetilgen xızmetler ushın tólemlerdi jumıs beriwshiden yamasa buyırtpashıdan óndiriw tártibi biykar etilmekte. Ózbekstan Respublikasınan tısqarıda jumıs izlep atırǵan shaxslardan Ózbekstan Respublikasınan sırtqa jumısqa ornalastırıw boyınsha xızmetler ushın haqı óndiriw boyınsha qadaǵan etiw alıp taslanbaqta.
Sonıń menen birge, jeke menshik bántlik agentliklerine sırt elde waqıtsha miynet etiwdi ámelge asırıw tileginde bolǵan puqaralardı kásip-ónerge hám shet tillerine oqıtıw boyınsha oqıw kursların shólkemlestiriw jáne bul processke sherik sırt el jumıs beriwshilerin tartıw huqıqın beriw názerde tutılmaqta. Jeke menshik bántlik agentlikleri tárepinen licenziya alıw ushın rezervleniwi zárúr bolǵan qarjılar muǵdarın azaytıw usınıs etilmekte.
Nızam joybarındaǵı normalar sırt elde waqıtsha miynet etiwdi ámelge asırıw tileginde bolǵan Ózbekstan Respublikası puqaralarınıń huqıqların qorǵawǵa, migraciya tarawında salamat báseki ortalıǵın qáliplestiriw, tarawǵa jeke menshik sektordı jáne de keńirek tartıw hám kórsetiletuǵın xızmetlerdi sanlastırıwǵa xızmet etedi.

Muhtarama Komilova, ÓzA