Bilimlendiriw tarawına kórsetilip atırǵan itibardıń nátiyjesinde anıq hám tábiyǵıy pánler boyınsha Ózbekstanda xalıqaralıq pán olimpiadaların ótkeriw ibratlı dástúrge aylandı.

Bul bolsa oqıwshılardıń bilim alıwǵa bolǵan umtılısı hám qızıǵıwshılıǵın kúsheytiw, olardıń bilimlerdi ózlestiriw dárejesin sırt elli zamanlasları menen salıstırıw ushın da ózine tán imkaniyat bolıp esaplanadı.
Paytaxtımızda Mektepke shekemgi hám mektep bilimlendiriwi ministrligi, Qánigelestirilgen bilimlendiriw mákemeleri agentligi hám Pán olimpiadaları orayı tárepinen Ábiw Rayxan Beruniy atındaǵı xalıqaralıq ximiya olimpiadası ótkerildi. Bilimler jarısı doslıq, aǵartıwshılıq, izleniw, sheberlik bayramına aylandı, desek asıra aytqan bolmaymız.
«Jańa Ózbekstan» universitetinde usı olimpiada jeńimpazların sıylıqlawǵa baǵıshlanǵan saltanatlı ilaj bolıp ótti.
Bul xalıqaralıq bilimler jarısı Ózbekstan Respublikası Prezidentiniń 2024-jıl 30-sentyabrdegi «Qábiletli jaslar menen islesiw sistemasın bunnan bılay da jetilistiriw ilajları haqqında»ǵı qararında belgilengen tiyisli wazıypalardıń orınlanıwın támiyinlew maqsetinde paytaxtımızda ekinshi márte ótkerilmekte.
Olimpiadada dúnyanıń 13 mámleketi – Saudiya Arabstanı, Túrkiya, Ázerbayjan, Mongoliya, Belarus, Vetnam, Rossiya, Gruziya, Hindstan, Qazaqstan, Qırǵızstan, Tájikstan, Túrkmenstan mámleketlerinen kelgen jáne Ózbekstan wákillerinen ibarat jámi 115 (28 komanda) oqıwshı-jaslar qatnastı.
Xalıqaralıq olimpiadanıń joqarı dárejede ótkeriliwin támiyinlew maqsetinde tóreshiler quramına Túrkiya, Saudiya Arabstanı, Rossiya, Belarus hám Angliya sıyaqlı sırt ellerden xalıqaralıq olimpiadalar tarawında kóp jıllıq tájiriybege hám joqarı potencialǵa iye ekspert-qánigeler, sonday-aq, Ózbekstannan akademiyalıq ataqqa iye professorlar tartıldı.
Olimpiada eki basqıshta shólkemlestirilip, birinshi turda ámeliy (laboratoriyalıq) jumıs túrinde tapsırmalar orınlanǵan bolsa, ekinshi tur jazba jumıs (teoriyalıq) túrinde bolıp ótti.
Olimpiada sheńberinde oqıwshı-jaslar ushın xalıqaralıq qánigelerdiń qatnasıwında bir qatar sheberlik sabaqları ótkerildi.
Sonday-aq, olimpiada qatnasıwshıları hám miymanlar ushın Tashkent hám Samarqand qalalarınıń tariyxıy hám mádeniy obektlerine sayaxatlar shólkemlestirildi. Olar elimizdiń mádeniy hám aǵartıwshılıq miyrası menen jaqınnan tanıstı.
Bul olimpiada ximiya páni boyınsha usı jıldıń iyul ayında ótkeriletuǵın Xalıqaralıq ximiya olimpiadasına gezektegi tayarlıq basqıshı bolıp xızmet etedi.
Ábiw Rayxan Beruniy atındaǵı xalıqaralıq ximiya olimpiadasınıń nátiyjelerine bola, 12 oqıwshı altın, 24 oqıwshı gúmis, 33 qatnasıwshı bronza medalına iye boldı.
Saltanatlı ilajda jeńimpazlar sıylıqlandı.

Nazokat Usmonova, ÓzA
Nosirjon Haydarov (súwret), ÓzAnıń xabarshıları