“Microsoft”tıń tiykarın salıwshısı Bill Geyts baylıǵınıń tiykarǵı bólegin keyingi 20 jıl ishinde Afrikada densawlıqtı saqlaw hám bilimlendiriw sistemasın rawajlandırıwǵa jumsaytuǵının málim etti. Bul haqqında BBC jazdı.

– Densawlıqtı saqlaw hám bilimlendiriw arqalı adamlardıń turmısı jaqsılanıp, Afrikadaǵı hár bir mámleket abadanlıqqa qádem taslawı kerek, – deydi 69 jasar milliarder.
Ótken ayda Bill 2045-jılǵa kelip, 200 milliard dollarǵa jetiwi kútilip atırǵan qarjınıń 99 procenti «qayırqomlıq»qa jumsalatuǵının aytqan.
Bizge belgili, Prezident Donald Tramptıń «Birinshi gezekte Amerika» siyasatı sheńberinde Afrikaǵa járdem, sonıń ishinde, AIV/AIJS penen kesellengen nawqaslardı emlew baǵdarlama toqtatıldı. Sondıqtan kontinent densawlıqtı saqlaw tarawınıń keleshegi kópshilikte qáweterleniw oyatpaqta. Isbilermenniń atap ótiwinshe, Geytstiń Afrikadaǵı kóp jıllıq jumıs tariyxına iye qorı tiykarǵı itibardı baslanǵısh medicinalıq járdemdi jaqsılawǵa qaratadı.

Musulmon Ziyo, ÓzA