Korrupciyaǵa qarsı gúresiw milliy keńesiniń májilisi bolıp ótti. Onda mektep hám mektepke shekemgi bilimlendiriw sistemasındaǵı korrupciya jaǵdayları hám olardıń aldın alıw boyınsha ámelge asırılıp atırǵan jumıslar hám bar mashqalalar dodalandı.

Keńes baslıǵı T.Norboeva basqarǵan májiliste tiykarǵı maqset kemshiliklerdi járiyalaw emes, al olarǵa birgelikte sheshim tabıwdan ibarat ekeni atap ótildi. Sonlıqtan, Senattıń tiyisli komitetleri hám uyımlardıń wákillerinen ibarat jumısshı topar ministrlik penen birgelikte jaǵdaydı hár tárepleme úyrendi.
“Korrupciyasız taraw” joybarı boyınsha bir qatar baǵdarlamalar qabıl etildi. Sonıń menen birge, mektepke shekemgi hám mektep bilimlendiriwine baylanıslı 79 normativlik-huqıqıy hújjet korrupciyaǵa qarsı ekspertizadan ótkerildi. Korrupciya qáwipin azaytıw maqsetinde bir qatar mámleketlik xızmetler elektron túrde engizildi. Sonıń ishinde, balanı mektepke shekemgi bilimlendiriw mákemesine jaylastırıw, 1-klassqa qabıllaw, pedagog kadrlardı attestaciyalaw, licenziyalaw, apostil qoyıw sıyaqlı xızmetler sanlastırıldı. Bul, óz gezeginde, puqaralar ushın qolaylıq jaratıwǵa xızmet etpekte.
Jaslarda korrupciyaǵa mawasasızlıq keypiyatın qáliplestiriw maqsetinde mektep hám baqsha tárbiyalanıwshıları ushın arnawlı “Korrupciyaǵa qarsı gúresiw” oqıw baǵdarlaması islep shıǵılǵanı málim etildi. Sonıń menen birge, mektep hám baqshalarda GRACE baǵdarlaması sheńberinde hadallıq tárbiyasın engiziw áhmiyetli ekeni atap ótildi.
T.Norboeva “Hadallıq vakcinası” menen shanshılǵan áwladtı kamalǵa keltiriw – bilimlendiriw sisteması aldındaǵı áhmiyetli wazıypalardan biri bolıwı kerek ekenligin atap ótti. Bunıń ushın tek oqıwshılar emes, al muǵallim hám tárbiyashılardıń ózi de sistemalı oqıtılıwı, qánigeligi arttırılıwı shárt.
Májilis juwmaǵı boyınsha bilimlendiriw sistemasında korrupciyaǵa qarsı ilajlardı jáne de jedellestiriw, jumısqa qabıl etiw processlerin tolıq sanlastırıw, mámleketlik satıp alıwlardıń ashıq-aydınlıǵın támiyinlew, ishki qadaǵalaw sistemasın kúsheytiw boyınsha anıq tapsırmalar berildi.

N.Abduraimova, ÓzA