Ózbekstan xalıqaralıq islamtanıw akademiyası «Dintanıw hám dúnya dinlerin salıstırmalı úyreniw YuNESKO» kafedrası tárepinen usı jıl 4-8-fevral kúnleri «Insanıy doslıq hám dinleraralıq qarım-qatnas – xalıqaralıq awızbirshilik faktorı» súreni astında ilimiy, mádeniy-aǵartıwshılıq hám sport ilajları shólkemlestirilgen edi. Bul háptelik Patsha Abdulla II atındaǵı «Jáhán dinleraralıq tatıwlıq hápteligi-2025» sıylıǵına múnásip dep tabıldı.

Búgin Ózbekstan xalıqaralıq islamtanıw akademiyasında usı sıylıqtı tapsırıw máresimi ótkerildi.
2010-jıl 23-sentyabrde Iordaniya Patshası Abdulla II baslaması menen BMSh Bas Assambleyasınıń 65-sessiyasında shólkemlestirilgen bul sıylıq hár jılı fevral ayınıń basında pútkil dúnya boylap keń kólemde ótkeriletuǵın arnawlı háptelik jeńimpazına beriletuǵının atap ótiw kerek.
Bul ret elimizde ánjuman sheńberinde 1300 den aslam ilaj shólkemlestirildi. Atap aytqanda, «Insanıy doslıq hám dinleraralıq qarım-qatnas – xalıqaralıq awızbirshilik faktorı» atamasındaǵı xalıqaralıq ilimiy-ámeliy seminar, «Diniy táliymatta keńpeyillik» atamasındaǵı studentler ilimiy ánjumanı, «Salamat isenim hám awızbirshilik – insanıy doslıq tiykarı» atamasındaǵı sociallıq videorolikler tańlawı, Akademiya studentleri teatr jámáátiniń «Sen jetim emesseń» atamasındaǵı saxnalıq kórinisi, Milletleraralıq qatnasıqlar hám sırt mámleketler menen doslıq baylanısları komiteti menen birgelikte «Ózbekstan – keńpeyil diyar» súreni astında respublikamızdaǵı milliy-mádeniy oraylardıń wákilleriniń qatnasıwında mádeniy shıǵıwlar, túrli din wákilleriniń qatnasıwındaǵı doslıq ilajı jáne shaxmat, shashka, stol tennisi hám mini-futbol boyınsha «Sport – mádeniyatlar kópiri» atamasında konfessiyalararalıq doslıq jarısı shólkemlestirildi.
Sıylıqtı tapsırıw máresiminde Iordaniya Hoshimiyler Patshalıǵınıń mámleketimizdegi Ayrıqsha hám tolıq huqıqlı elshisi Demiya Zuhayr Haddod, Ózbekstan xalıqaralıq islamtanıw akademiyasınıń rektorı Muzaffar Komilov, Din isleri boyınsha komitet baslıǵınıń birinshi orınbasarı Davronbek Maxsudov, Ózbekstan musılmanları mákemesi baslıǵınıń birinshi orınbasarı Homidjon Ishmatbekov, Sırtqı isler ministrliginiń wákilleri, professor-oqıtıwshılar hám studentler qatnastı.
Elshi jeńimpazlardı qutlıqlap, bul jetiskenlik Ózbekstannıń dinleraralıq qarım-qatnas hám keńpeyillik tarawındaǵı mámleketlik siyasatı xalıqaralıq dárejede tán alınıp atırǵanın atap ótti.
Ulıwmainsanıylıq doslıq hám keńpeyillikti bekkemlew, óz-ara húrmet hám diniy isenimniń kóptúrliligin ańlaw dúnya xalıqları arasında tınıshlıq hám awızbirshilikti támiyinlewde áhmiyetli faktor ekeni ilajda jáne bir márte atap ótildi. Sonday-aq, elimizde milletleraralıq tatıwlıq hám dinleraralıq keńpeyillik principi ayrıqsha orın iyeleytuǵını, bul baǵdarda tutas, tereń oylanǵan siyasattı ámelge asırıwǵa qaratılǵan ámeliy ilajlar turmısqa engizilip atırǵanına itibar qaratıldı.
Iordaniya Hoshimiyler Patshalıǵınıń mámleketimizdegi Ayrıqsha hám tolıq huqıqlı elshisi Demiya Zuhayr Haddod Akademiya rektorı Muzaffar Komilovqa Patsha Abdulla II atındaǵı «Jáhán dinleraralıq tatıwlıq hápteligi-2025» sıylıǵın saltanatlı túrde tapsırdı.

Kamola Yusupova,
Nosirjon Haydarov (súwret), ÓzA