Stambuldaǵı sóylesiwler waqtında Rossiya tárepi de Kievke kelispewshilikti sheshiw boyınsha memorandumdı tapsırdı. Hújjettiń tolıq teksti internette járiyalandı, dep xabar berdi “RIA Novosti”.

Memorandum “Sońǵı kelisimniń tiykarǵı kriteriyası”, “Oq atıwdı toqtatıw shárti” hám “Basqıshlardıń izbe-izligi hám ámelge asırıw múddeti” bólimlerinen ibarat.
Birinshi bólimde tiykarǵı talap tómendegishe: Rossiya Federaciyasınıń jańa aymaqların tán alıw, Ukraina áskerlerin alıp shıǵıw, Ukrainanıń biytáreplik statusı, sırt el hám yadrolıq kúshlerdi jaylastırıwdı qadaǵan etiw, Ukraina Qurallı Kúshleriniń sanın sheklew hám rus tiliniń rásmiy statusı. Sonday-aq, sankciyanı biykarlaw, óz-ara dawlardan waz keshiw, Ukraina pravoslav shirkewi erkinligi hám diplomatiyalıq baylanıstı tiklew de usınıs etilgen.
Ekinshi bólimde oq atıwdı toqtatıwdıń eki jolı kórsetilgen – Ukraina áskerlerin RF aymaǵınan jedel alıp shıǵıw yamasa “paket usınıs” – 10 qádem, sonıń ishinde, mobilizaciyanı saplastırıw, qural-jaraq jetkerip beriwdi qadaǵan etiw, amnistiya hám prezidentlik saylawına tayarlıq.
Juwmaqlawshı bólim marhumlardıń óli denelerin almastırıw ushın kelisim dúziw, oq atıwdı toqtatıw haqqındaǵı kelisimge qol qoyıw, saylaw hám BMShta tınıshlıq shártnamasın ratifikaciyalawdı názerde tutadı.
Rossiya delegaciyasınıń basshısı Medinskiydiń atap ótiwinshe, memorandum ultimatum emes, al kelispewshilikti siyasiy hám diplomatiyalıq jol menen sheshiw ushın tiykar bolıp esaplanadı.

Qaraqalpaqstan xabar agentligi