“ZAKOVAT” intellektuallıq klubında ALOHA Mental arifmetika boyınsha 8-Respublikalıq balalar jarısı bolıp ótti. Onda respublikamızdıń kóplegen qalalarınan 5 jastan 13 jasqa shekemgi 400 ge shamalas balalar qatnastı.

Bizge belgili, Abacus Learning of Higher Arithmetic – ALOHA jas balalar ushın mólsherlengen, miydiń eki yarım sharı únles rawajlanıwına járdem beretuǵın hám qızıqlı túrde ótkeriletuǵın xalıqaralıq mental arifmetika baǵdarlaması.
ALOHA komandası bul boyınsha 2017-jıldan berli turaqlı túrde Respublikalıq jarıslardı shólkemlestirip kelmekte. Bul – balalar ushın óz qábiletlerin kórsetiw, eń jaqsı nátiyje ushın sıylıq alıw, dosları hám shańaraǵı menen qızıqlı hám paydalı waqıt ótkeriw imkaniyatı.
Búgingi kúnge shekem AQSh, Kanada, Rossiya, Meksika, Germaniya, Irlandiya, Ispaniya, Hindstan, Qıtay, Malayziya sıyaqlı dúnyanıń 45 mámleketinde 4 millionnan aslam bala patentlengen ALOHA baǵdarlaması boyınsha tabıslı bilim almaqta.
Mental arifmetika tek baǵdar emes. Bul ajıralmas texnika bolıp, onıń járdeminde balaǵa tek ǵana kalkulyatordan tezirek esaplawdı úyretiw emes, al onıń dóretiwshilik potencialın, tallaw hám sın kózqarastan pikirlew qábiletin rawajlandırıw múmkin. Bul pútkil miydi rawajlandırıwǵa járdem beredi hám isenimdi bekkemleytuǵın hám turmıstıń barlıq tarawlarında tabısqa úles qosatuǵın yad hám dóretiwshilik sıyaqlı tiykarǵı kónlikpelerdi jaqsılaydı.
Ilaj dawamında balalar kewilashar baǵdarlamalar, sonıń ishinde, oqıtıwshılar menen oqıw oyınların ótkerdi. Jeńimpazlarǵa sertifikatlar tapsırıldı.
Barlıq qatnasıwshılar estelik sawǵaları menen sıylıqlandı.

Gulnoza Boboeva, ÓzA