Házirgi waqıtta Bozataw, Moynaq hám Qanlıkól rayonlarında ótkerilip atırǵan seminarlar júzlegen hayal-qızlardıń ármanların júzege shıǵarıwǵa, biznes-reje tayarlap isbilermenligin baslawǵa ilham berip, moynaqshı hayal-qızlardıń turmısına da jańa ózgeris alıp kelmekte.

“Awıl isbilermenligin rawajlandırıw – 2-faza” joybarı sheńberinde 1500 hayal-qız ️5 modul tiykarında bilim almaqta. Bul oqıwda qánigeler tárepinen aytılǵan sózler, ótkerilgen prezintaciyalar, ámeliy sabaqlar olarǵa kúsh baǵıshlap, isbilermenlik jumısın baslawǵa motivaciya bermekte.
Oqıwlarda hayal-qızlardıń isbilermenligin rawajlandırıw joybarları boyınsha da maǵlıwmatlar berilmekte. Atap ótilgenindey, eń jaqsı grant joybarları 5000 – 15000 AQSh dolları muǵdarında qarjılandırıladı. Shınında da bul úlken qarjı. Bul nárse hayal-qızlarǵa bolǵan isenim, olardıń ármanlarına ashılǵan keleshek esigi.
Seminarǵa Moynaq rayonı hákimi B.Menglibekov qatnasıp, ol barlıq qatnasıwshılarǵa áwmet hám tabıslar tiledi!
Atap ótilgenindey, moynaqshı hayal-qızlar da grant tiykarında óz bisnesin baslamaqta. Búgin Moynaq rayonı tek ǵana ilham hám isenim mákanı emes, al imkaniyatlar orayına da aylanıp, kúshli, erkin hám belsendi hayal-qızlar jerine aylanbaqta.
Kámbaǵallıqtı qısqartıw hám bántlik ministrligi, «CEED» (Bolgariya), «Annexure» xalıqaralıq biznesti qollap-quwatlawshı birge islesiwshi shólkemler tárepinen ótkerilip atırǵan bunday ilajlar orınlarda dawam etpekte.

Qaraqalpaqstan xabar agentligi