Insan huqıqları boyınsha Ózbekstan Respublikası Milliy orayında «Tong yulduzi» hám «Klass!» respublikalıq balalar hám jas óspirimler basılımları redakciyaları menen birgelikte shólkemlestirilgen «Klimat ózgeriwi hám ekologiya – balalar názerinde» tańlawınıń jeńimpazların sıylıqlaw máresimi bolıp ótti.

Ilajdı Milliy oray direktorı Akmal Saidov alıp bardı.
Málim etiliwinshe, tańlawǵa 2025-jıl 12-fevral sánesinde start berilgen bolıp, qısqa múddet ishinde «Tong yulduzi» hám «Klass!» redakciyalarına 300 den aslam maqala, shıǵarma hám basqa da dóretiwshilik jumıslar kelip túsken.
Máresim dawamında tańlaw qatnasıwshıları tárepinen jiberilgen ayırım dóretiwshilik jumıslardan úlgiler oqıp esittirildi, videorolikler kórsetildi. Jas dóretiwshilerdiń dóretiwshilik jumıslarında olardıń tábiyatqa bolǵan mehir-muhabbatı, ekologiyalıq mashqalalarǵa biypárwa emesligi hám hár bir jumısta ózine tán qatnas anıq kórindi.
Jeńimpazlar «Eń jaqsı maqala hám shıǵarma» jáne «Eń jaqsı videorolik» nominaciyaları boyınsha diplom, minnetdarshılıq xatı hám estelik sawǵaları menen sıylıqlandı.
Ilajda shıǵıp sóylegenler jas áwladtı ana-Watanǵa sadıqlıq, tábiyatqa húrmet ruwxında tárbiyalaw, ekologiyalıq bilimlerin arttırıw áhmiyetli ekenligin ayrıqsha atap ótti.

Umidjon QURBONOV,
ÓzAnıń xabarshısı