Házirgi waqıtta Oliy Majlis Nızamshılıq palatasınıń gezektegi májilisinde Ózbekstan Respublikası Mámleketlik byudjetiniń hám mámleketlik maqsetli qorları byudjetleriniń 2024-jıl jáne 2025-jıldıń birinshi sheregindegi orınlanıwı haqqındaǵı esabat kórip shıǵılmaqta.

Bul másele boyınsha Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov bayanat jasamaqta.
Esabatta keltirilgenindey, 2024-jılı Mámleketlik byudjet qárejetleriniń 50 procenti sociallıq tarawǵa baǵdarlanǵan. Atap aytqanda, bilimlendiriw, ilim, densawlıqtı saqlaw tarawlarına sociallıq qárejetlerdiń 72 procenti qaratıldı. Bilimlendiriwge ajıratılǵan qarjılardıń muǵdarı ótken úsh jılda derlik 12 trillion sumǵa arttırıldı hám 45 trillion sumǵa jetti.
– Jeke menshik mekteplerdi qollap-quwatlaw baǵdarındaǵı reformalar nátiyjesinde mámleketlik emes ulıwma bilim beriw mektepleriniń sanı 115 ke jetti. 2024-jıl 1-sentyabrden baslap pedagoglardıń aylıq miynet haqıları 15 procentke arttırıldı. Pedagoglardı materiallıq xoshametlew maqsetinde hár aylıq ústemeler ushın derlik 2 trillion sum ajıratıldı. Mekteplerde shet tillerin oqıtıw hám ǵalaba en jaydırıw maqsetinde mekteplerge 500 sırt elli muǵallimler tartılıp, olarǵa 111 milliard sum tólep berildi.
Xalıqqa sapalı medicinalıq xızmetler kórsetiliwin támiyinlew maqsetinde tarawǵa ajıratılǵan qarjılar muǵdarı 2023-jılǵa salıstırǵanda 5 trillion sumǵa arttırılıp, 36 trillion sumǵa jetti. Balalardı shanshıw ushın 240 milliard sum, dári-dármaq, medicinalıq qurallar ushın 3 trillion sum ajıratıldı,-dedi Bas ministrdiń orınbasarı.
Májilis óz jumısın dawam ettirmekte.

Muhtarama Komilova,
ÓzA