Usı jıldıń 1-2-iyun kúnleri Samarqand qalasında Ózbekstan-Qıtay ekinshi aymaqlararalıq forumı ótkerildi.

Forum juwmaqları boyınsha búgin, 2-iyun kúni Ministrler Kabinetinde Ózbekstan Respublikası Bas ministri Abdulla Aripov Qıtay delegaciyası basshısı – Qıtay Xalıq Siyasiy másláhát Keńesi baslıǵınıń orınbasarı, ShBShnıń qońsıshılıq, doslıq hám birge islesiw boyınsha Qıtay komiteti baslıǵı Shen Yueyue menen ushırasıw ótkerdi.

Ushırasıw aldında Shen Yueyue xanım Qıtay Xalıq Respublikası Baslıǵı Si Czinpin hám Qıtay Xalıq Siyasiy másláhát keńesiniń baslıǵı Van Xuninniń Ózbekstan Respublikası Prezidenti Shavkat Mirziyoevqa jollaǵan qızǵın sálemi hám jaqsı tileklerin jetkerip qoyıwdı soradı.
Búgin eki mámleket arasındaǵı birge islesiw barlıq sharayatlarda hár tárepleme strategiyalıq sheriklik dárejesine kóterildi. Onda, álbette, mámleketlerimiz Jetekshileri arasındaǵı qızǵın tuwısqanlıq qatnasıqları úlken áhmiyetke iye.
Qıtay Ózbekstannıń ǵárezsizligi, aymaqlıq birligi hám milliy mápleri jolında alıp barıp atırǵan siyasattı tolıq qollap-quwatlawda dawam etetuǵının bildirdi.
Atap ótilgenindey, Ózbekstan Qıtaydıń Oraylıq Aziyada áhmiyetli sawda- ekonomikalıq sherigi esaplanadı. Mámleketimizde Qıtay kapitalınıń qatnasıwında 3700 den aslam birgeliktegi kárxana jumıs islemekte. Infrastruktura, sanaat kooperaciyası, awıl xojalıǵı, «jasıl» energiya tarawlarında iri birgeliktegi joybarlar ámelge asırılmaqta.
Usı jıldıń 1-iyun kúni mámleketlerimiz arasında kúshke kirgen vizasız tártip eki mámleket isbilermenleri sheńberinde qatnasıqlardı rawajlandırıw hám turistlerdiń aǵımın jánede arttırıwda áhmiyetli orın tutatuǵını, sonday-aq, Samarqand qalasında ótkerilgen ekinshi aymaqlararalıq forumınıń juwmaqları boyınsha erisilgen kelisimler hám qol qoyılǵan kelisimler hám kommerciyalıq shártnamalar óz-ara qatnasıqlardı rawajlandırıwǵa úles qosatuǵını atap ótildi.
Ushırasıwda eki tárepleme qatnasıqlardı jáne de keńeytiw, atap aytqanda, sawda-ekonomikalıq, transport hám logistika, sanaat kooperaciyası, mádeniy-gumanitarlıq hám ilim tarawlarındaǵı birge islesiwdi tereńlestiriw boyınsha hár tárepleme pikir alısıldı.

Qaraqalpaqstan xabar agentiligi