Ózbekstan Evropa aldıńǵı uglerod hám grafit materialları associaciyasınıń (ECGA) tolıq aǵzasına aylandı. Bul arqalı mámleket globallıq grafit sanaatı orayına Oraylıq Aziyadaǵı birinshi mámleket sıpatında qosıldı.

Belgiya paytaxtı Bryusselde bolıp ótken ushırasıwda Ózbekstan texnologiyalıq metallar kombinatı basqarma baslıǵınıń orınbasarı Amir Abidov xalıqaralıq jámiyetshilikke kombinattıń ilimiy-izertlew jumısları, óndirislik quwatlıqları hám texnologiyalıq potencialı haqqında prezentaciya ótkerdi. Texnologiyalıq metallar kombinatınıń ilimge tiykarlanǵan qatnası hám regionallıq jetekshilik poziciyası ECGA aǵzaları tárepinen joqarı bahalandı.
Eger birgeliktegi birge islesiwimiz izbe-iz dawam etse, bul Evropa Awqamı ushın strategiyalıq resurslar támiynatında áhmiyetli orın iyeleydi. Bul platforma texnologiyalıq rawajlanıw, sanaat integraciyası hám bilim almasıw baǵdarında úlken imkaniyatlar jaratadı, – deydi associaciyanıń bas xatkeri Korina Xebestreyt.
Bul associaciyaǵa aǵzalıq Ózbekstanǵa Evropanıń jetekshi ilimiy orayları menen birge islesiw, grafit hám uglerod texnologiyaların Ózbekstanǵa transferlew, xalıqaralıq mamanlıq baǵdarlamalarında qatnasıw, R&D hám jasıl texnologiyalar baǵdarında tájiriybe almasıw sıyaqlı imkaniyatlardı beredi.
Maǵlıwmat ushın: ECGA – 33 mámleket wákillerin birlestirgen abıraylı platforma bolıp, grafit hám uglerod materialları tarawında aldıńǵı texnologiyalar, ilimiy oraylar hám islep shıǵarıwshılardı bir jerge jámleydi.

MǴKA málimleme agentligi