Usı jıldıń 26-30-may kúnleri Úrgensh mámleketlik universitetinde matematika boyınsha Al-Xorezmiy atındaǵı III xalıqaralıq olimpiada ótkerildi.

Bul abıraylı jarısta dúnyanıń jetekshi mámleketlerinen Braziliya, AQSh, Qıtay, Hindstan, Qubla Koreya, Malayziya, Yaponiya, Vetnam, Rossiya, Serbiya, Qırǵızstan, Qazaqstan, Tájikstan, Túrkiya, Túrkmenstan sıyaqlı mámleketlerden, sonday-aq, Ózbekstannıń túrli joqarı bilimlendiriw mákemelerinen matematika tarawındaǵı qábiletli studentler qatnastı.
Olimpiada dawamında qatnasıwshılar quramalı hám qızıqlı matematikalıq máselelerdi sheship, ózleriniń bilimlerin kórsetti.
Olimpiadanıń komandalıq bellesiwleriniń nátiyjelerine bola, Qıtaydıń Ilim hám texnologiyalar universiteti maksimal 210 balldan 189 ball toplap, 1-orındı iyeledi. Ekinshi orındı Qubla Koreyanıń Seul milliy universiteti 187 ball menen qolǵa kirgizdi. Úshinshi orın bolsa 186 ball menen Qıtaydıń Nankai universitetine nesip etti.
Sonday-aq, individual jarıs jeńimpazları da múnásip sıylıqlandı. Óz bilim hám sheberliklerin tolıq kórsetken qatnasıwshılarǵa 10 altın medal, 19 gúmis medal hám 27 bronza medal tapsırıldı.
Komandalardıń trenerleri de itibarǵa alınıp, múnásip sıylıqlandı.
– Bul nátiyjeler olimpiadada qatnasqan studentler hám olardıń ustazları tárepinen úlken tabıs sıpatında qabıl etildi, – deydi matematik ilimpaz, ÓzIA akademigi, professor Shavkat Ayupov. – Olimpiadanıń xalıqaralıq kólemdegi áhmiyeti, jas áwladtı ilimge tartıwdaǵı ornı oǵada úlken dep bilemen. Bunday jarıslar mámleketimizdiń ilim hám bilimlendiriw tarawında dúnya jámiyetshiliginde óz ornın bekkemlewge xızmet etedi.
Al-Xorezmiy atındaǵı III xalıqaralıq matematika olimpiadasınıń saltanatlı jabılıw máresimi milliy nama-qosıqlar menen kóterińki ruwxta bolıp ótti. Dástúriy hám zamanagóy muzıkalı shıǵıwlar máresimge ózine tán ráńbáreńlik baǵıshlap, qatnasıwshılar hám miymanlarda jıllı tásir qaldırdı.

Ahmadjon Shokirov,
ÓzAnıń xabarshısı