Qazaqstan paytaxtı Astana qalasında «AIF – 2025» xalıqaralıq forumı dawam etpekte. Onda jetekshi siyasatshılar, xalıqaralıq shólkemler, korporaciyalar, investorlar, ilimpazlar, jurnalistler qatnaspaqta.

Xalıqaralıq qáwipsizlik, energetika hám klimat ózgeriwi, ekonomika hám qarjı sıyaqlı global máselelerdi dodalaw qızǵın dawam etip atırǵan ilaj sheńberinde sessiyalar, ushırasıwlar, brifingler shólkemlestirilmekte.
Qazaqstan Respublikası Sırtqı isler ministriniń orınbasarı Alibek Quantırov, «Qazaqinvest» kompaniyası basqarma keńesiniń baslıǵı Erjan Elekeev, usı kompaniyanıń basqarma keńesi baslıǵınıń orınbasarı Madiyar Sultanbek jurnalistler menen ushırasıwda mámleket jetekshisi Qasım-Jomart Toqaevtıń basshılıǵında konstruktivlik birge islesiwge tiykarlanǵan sırtqı siyasat júrgizilip atırǵanı, sóylesiwdiń ústinligi, sonday-aq, suveren huqıqlardı húrmet etiwge tiykarǵı áhmiyet beriletuǵını atap ótildi.
Astana xalıqaralıq forumı ekonomikalıq hám zamanagóy texnologiyalar menen baylanıslı global máselelerdi qamtıp alǵan bolsa da, onıń tiykarǵı mánisinde, álbette, doslıqqa tiykarlanǵan birge islesiw baylanısların kúsheytiw maqseti jatır. Astanadaǵı Kongress orayında dawam etip atırǵan iri ánjumanǵa dúnyanıń júzge shamalas mámleketinen 6 mıńǵa shamalas qatnasıwshı qatnaspaqta.
Qazaqstan Respublikası Sırtqı isler ministriniń orınbasarı Alibek Quantırov Oraylıq Aziya regionındaǵı awızbirshilik mámleketler basshılarınıń siyasiy erk-ıqrarı nátiyjesi ekenine itibar qarattı. Region xalıqlarınıń turmısına baylanıslı máseleler de birge islesiw tiykarında sheshimin tawıp barmaqta.
ÓzAnıń «Ózbekstan hám Qazaqstannıń birge islesiw baylanısların qalay bahalaysız?» degen sorawına A.Quantırov eki mámleket arasındaǵı isenimli birge islesiw baylanısları joqarı dárejede ekenin atap ótti. Biz ózbek kásipleslerimiz benen oǵada jaqın birge islesiwdi dawam ettirip atırmız.
«Qazaqinvest» kompaniyası basqarıw keńesiniń baslıǵı Erjan Elekeev eki mámleket arasında sawda hám investiciyalıq birge islesiw, sonday-aq, sanaat tarawında birge islesiwge baylanıslı «jol kartası» bar ekenligin atap ótti.
– Ózbekstan Respublikası Investiciyalar, sanaat hám sawda ministrligi janındaǵı Investiciyalardı tartıw agentligi menen turaqlı sóylesiw, tıǵız birge islesiwimiz bar, – dedi E.Elekeev. – Máselen, kelesi háptede Tashkentte iri xalıqaralıq forum ótkeriliwi rejelestirilgen. Biz de oǵan qatnasamız. Túrkiy mámleketler shólkemi sheńberinde investiciya tarawında birge islesiwdi rawajlandırıw rejesi de bar. Ne ushın men bul máselege itibar qaratıp atırman? Sebebi, Yaponiya, AQSh yamasa Evropa Awqamındaǵı iri mámleketler Oraylıq Aziyanı tutas bir region sıpatında kóredi. Sonıń ushın biz ushın óz-ara básekiles bolıw emes, al birgeliktegi investiciyalıq joybarlardı alǵa qoyıw tek payda keltiredi. Máselen, logistika, kánshilik hám metallurgiya, avtomobil islep shıǵarıw tarawında ózbek kásipleslerimiz oǵada jedel rawajlanbaqta. Qazaqstan, Ózbekstan hám basqa da Oraylıq Aziya mámleketleri birgeliktegi investiciyalıq sheshimlerdi islep shıǵıwımız maqsetke muwapıq.
– Jaqında Tashkentte bolıp, Investiciyalar, sanaat hám sawda ministrligi Laziz Qudratov penen ushırasıp, mámleketlerimiz arasındaǵı birge islesiwdiń unamlı nátiyjelerin dodaladıq, – dedi «Qazaqinvest» kompaniyası basqarıw keńesi baslıǵınıń orınbasarı Madiyar Sultanbek. – Usı jerde bir mısal keltirsem, ótken jıldıń ózinde Qazaqstanda jumıs alıp barıp atırǵan ózbekstanlı kompaniyalardıń sanı 19 procentke arttı. Bul kompaniyalar yamasa tolıq ózbek kapitalına yamasa birgeliktegi ózbek-qazaq kapitalına iye. Házirgi kúnde olardıń sanı 3,3 mıńǵa jetti. Bul bolsa, ózbek biznesiniń mámleketimizge bolǵan úlken qızıǵıwshılıǵın kórsetedi.
Bolajaq Tashkent forumı sheńberinde qospa joybarlardı ámelge asırıw boyınsha birge islesiwimizdi jáne de bekkemlew niyetindemiz.

Norgul Abduraimova, ÓzA
Tashkent – Astana