Nókis qalasındaǵı 1-sanlı sport mektebinde sporttıń Belbewli gúres túrinen Ózbekstan Respublikası Prezidenti sıylıǵı ushın jas óspirimler arasında Jáhán hám Aziya chempionatı bellesiwleriniń ashılıw saltanatı bolıp ótti.

Saltanatlı máresimde Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ózbekstan Respublikası Sport ministriniń orınbasarı Shaxrillo Maxmudov, xalıqaralıq belbewli gúres federaciyasınıń prezidenti Xabir Xabibulin, Aziya belbewli gúres federaciyasınıń prezidenti Mwmin Muratov shıǵıp sóylep, barlıq qatnasıwshılardı jarıstıń ashılıwı múnásibeti menen qutlıqladı hám olarǵa áwmet tiledi.
Atap ótilgenindey, sońǵı jılları elimizde húrmetli Prezidentimizdiń basshılıǵında denetárbiya hám sporttı rawajlandırıw, jaslardı sportqa keńnen qamtıp alıw, Olimpiada sport túrleri menen bir qatarda milliy sport túrlerin de rawajlandırıwǵa ayrıqsha itibar qaratılıp, bul baǵdarda keń kólemli ilajlar ámelge asırılıp atır.
Álbette, usınday jarıslardıń ótkeriliwi elimizde belbewli gúres sport túrin jáne de ǵalaba en jaydırıwda lastırıwda hám xalıqaralıq bellesiwler jeńimpazların jetilistirip shıǵarıwda áhmiyetli orın iyeleydi.
Bunnan soń kún dawamında ótkeriliwi belgilengen sport jarısları baslap jiberildi. Keskin bellesiwlerge bay bolǵan jarıs sońında, ul balalar arasında 45 kg salmaqta qırǵızstanlı Albert Abdukarov birinshi, rossiyalı Temirlan Xodjakov ekinshi, ózbekstanlı Ziyodulla Mahammadvaliev hám jáne bir qırǵızstanlı Elbek Ismailovlar úshinshi orındı iyelewge miyasar boldı. 50 kg salmaqta bolsa, túrkmenstanlı Bashımmuhammedov barlıq qarsılasların jeńip altın medaldı jeńip alǵan bolsa, Ózbekstan saylandı komandası aǵzası Abdumajid Xusanbaev gúmis, rossiyalı Nikita Petrov hám saylandı komandamızdıń jáne bir aǵzası Asrorbek Ǵafurovlar qola medalın qolǵa kirgizdi. 55 kg da elimiz saylandı komandası aǵzası Ramziddin Abdulxamidovqa teń keletuǵın qarsılas tabılmadı hám finalda ol rossiyalı Islam Totorkulovtı jeńip jáhán chempionına aylandı. Túrkmenstanlı Palvan CHoriev hám qazaqstanlı Alisher Nazarovlarǵa qola medalı nesip ettti. 60 kg da qazaqstanlı Sherxan Esbolat finalda rossiyalı Amir Batshaevtı jeńip altın medaldı jeńip aldı. Ózbekstan saylandı komandası aǵzaları Muhibullah Sadirdinov hám Asilbek Muhammedovlarǵa qola medalın qolǵa kirgizdi. 65 kg da awǵanstanlı palwanlardan Muhammad Omar Azizi birinshi, Javed Karimi ekinshi, túrkmenstanlı Gadirgeldi Saparov hám qırǵızstanlı Atabek Nishonovlar úshinshi orınlardı iyelewge eristi. 71 kg da mámleketimiz wákili Sherzodbek Elibaev altın, rossiyalı Axmad Xubiev gúmis, onıń komandalası Magomademin Murtazaliev hám qırǵızstanlı Suban Apsamatovlar qola medalına miyasar boldı. 77 kg salmaqta bolsa, mámleketimiz saylandı komandası aǵzası Vaisbek Mamataliev altın, rossiyalı Alim Semyonov gúmis, jáne bir rossiyalı palwan Tulpar Rataev hám ózbekstanlı Azizjan Bazarovlar qola medalın jeńip aldı.
85 kg salmaqta túrkmenstanlı Selim Annazarov birinshi, rossiyalı Danila Voroncov ekinshi, iranlı Muhammada Mehdi Vaziri hám ózbekstanlı Sarvarjan Turdievler úshinshi orınǵa ılayıq dep tabıldı. 95 kg da qırǵızstanlı Elbek Zainabiddinov altın, qazaqstanlı Abbaz Raxat gúmis, monǵoliyalı Batbayaar Batbilguun, rossiyalı Amir Xafizovlar qola medalın jeńip aldı. Eń awır salmaqta bolsa, rossiyalı Tamirlan Muxashev altın, qırǵızstanlı Apsamat Ermamatov gúmis, qazaqstanlı Adilkerey Meyirkul hám rossiyalı Asxat Appakovlar qola medalı menen sıylıqlandı.
Al, qızlar arasında bolsa, mámleketimiz saylandı komandası aǵzası esaplanǵan jerlesimiz Tumaris Qalabaeva 44 kg salmaqta barlıq qarsılasların jeńip, jáhán chempionı ataǵına miyasar boldı. Sıylı ekinshi hám úshinshi orınlar bolsa, rossiyalı Ziliya Salaxova, Zarina Gabidullina hám mámleketimiz wákili Gulsanam Solievalarǵa nesip etti. 48 kg da rossiyalı Diana Kotlovskaya altın, qazaqstanlı Inabat Tazitay gúmis, mámleketimiz wákili Ruxshona Avazova qola, rossiyalı Rayaana Gazievalar qola medalın jeńip aldı.
52 kg salmaqta Ózbekstan saylandı komandası aǵzası Sarbinaz Rustamova altın, Gulsanam Abdukarimova gúmis, rossiyalı Anna Щepotkina hám Xadijat Djabrailovalar qola medalına qolǵa kirgizdi.
57 kg salmaqta da saylandı komandamız palwanları ózleriniń sheberliklerin kórsetip Gulzada Twlqinova altın, Mehrinaz Ibrohimova gúmis, rossiyalı Serafima Shpilevaya hám monǵoliyalı Xuslen CHinzarig qola medalına ılayıq dep tabıldı.
63 kg da rossiyalı Varvara Omelina finalda mámleketimiz wákili Gulsevar Norqobilovanı jeńip, jáhán chempionına aylandı. Qırǵız Respublikasınan Nurayım Mavlona hám ózbekstanlı Zilola Mullabazarovalar qola medalına miyasar boldı.
70 kg salmaqta bolsa, elimiz saylandı komandası quramında qatnasqan, jáne bir jerlesimiz Aysulıw Qıdırbaeva altın medalǵa erisip, rossiyalı Anastasiya Gafanovanı jeńip jáhán chempionı ataǵına miyasar boldı.
Al, sıylı úshinshi orınlardı bolsa, mámleketimiz sportshılarınan Shodiyona Tuychibaeva hám Malika Absalamovlar jeńip aldı.
Eń awır salmaqtaǵı palwanlar arasında bolsa, rossiyalı Anoshina Sofiya birinshi, qazaqstanlı Shazana Yakubova ekinshi, qırǵızstanlı Jasmin Mederbekova hám Azila Fatixovalar qola medalına miyasar boldı.
Ótkerilgen jarıs dawamında óz salmaq kategoriyası boyınsha jeńimpazlar qatarınan orın alǵan bir qatar jaslarǵa medal hám bahalı sawǵalar tapsırıldı.

Adilbay Orazov,
Qaraqalpaqstan xabar agentligi sholıwshısı