Astana qalasında Qıtay Xalıq Respublikası hám regionnıń bes mámleketi – Ózbekstan, Qazaqstan, Qırǵızstan, Tájikstan hám Túrkmenstan ǵalaba xabar quralları wákilleriniń qatnasıwında «Oraylıq Aziya – Qıtay» xalıqaralıq media forumı jumıs basladı. Qıtaydıń abıraylı basılımlarınan biri sıpatında tán alınǵan «Jenmin jibao» hám Qazaqstan Respublikası Prezidenti teleradiokompleksi menen birgelikte shólkemlestirilgen májiliste siyasiy uyımlardıń wákilleri, diplomatlar, ǵalaba xabar qurallarınıń basshıları, sonday-aq, media ekspertler hám baspalardan ibarat 200 ge shamalas delegat qatnaspaqta.
Ánjumannıń ashılıwında Qazaqstannıń ishki siyasat hám kommunikaciyalar boyınsha járdemshisi Arman Kırıkbaev Qasım-Jomart Toqaevtıń media-forum qatnasıwshılarına jollaǵan qutlıqlawın oqıp esittirdi. Sonday-aq, májilis aldında Qıtay Kommunistlik partiyası Oraylıq komiteti úgit-násiyatlaw bólimi baslıǵınıń orınbasarı Xu Xepin, Qazaqstan Respublikası Prezidenti teleradiokompleksiniń Bas direktorı Raushan Kajibaeva, «Jenmin jibao» gazetası bas redaktorınıń orınbasarı Fan Czyanshan hám basqalar qutlıqlaw sózi menen shıǵıp sóyledi.
Bul ilajdan gózlengen tiykarǵı maqset, ǴXQ birge islesiwiniń jańa imkaniyatların dodalaw, óz-ara tájiriybe almasıw hám tez ózgerip atırǵan media mákanda birgeliktegi baslamalardı alǵa qoyıwdan ibarat. Dodalawlar sheńberinen sanlı transformaciya, ǴXQǵa jasalma intellektti engiziw, kreativ industriyanı rawajlandırıw, media sawatlılıqtı arttırıw, jalǵan jańalıqlarǵa qarsı gúresiw, sonday-aq, regionallıq ózine tánlik hám málimleme qáwipsizligi sıyaqlı máseleler orın aldı. Ekspertlerdiń pikirinshe, bul forum keleshekte Oraylıq Aziya mámleketleri hám Qıtay málimleme birge islesiwin bekkemlew, globallıq mashqalalar sharayatında media sherikligi ushın jańa gorizontlar ashıw ushın áhmiyetli maydanǵa aylanadı.
Mırza Fan Czyanshan házir dúnya misli kórilmegen ózgerislerdi basınan ótkerip atırǵanına itibar qarattı:
– Búgingi globallasıw dáwirinde jańa shaqırıq hám imkaniyatlarǵa dus kelip atırmız. Fakt, salamat pikir hám ulıwmalıq bilim úlken áhmiyetke iye bolıp atırǵan bir waqıtta jalǵan xabar, qolaysız pikirge qarsı turıwımız, regionda anıq jámiyetlik pikirdi saqlaw ushın birgelikte háreket etiwimiz kerek. Tiykarǵı mápimizge baylanıslı barlıq máselelerde bir-birimizdi qatań qollap-quwatlawımız kerek. Málimleme texnologiyalarınıń rawajlanıwı ǵalaba xabar qurallarınıń jumısın ózgertpekte. Sonıń ushın málimleme agentlikleri, televidenie, gazeta hám radio zamanagóy texnologiya jetiskenliklerinen belsene paydalanıwı kerek.
Raushan Kajibayeva xanım «Ullı Jipek jolı» dúnya tártibindegi úlken ózgerislerdiń tek ǵana gúwası emes, al háreketlendiriwshi kúshine aylanǵanın, búgingi kúnde Shıǵıs hám Batıstı baylanıstıratuǵın qurǵaqlıqtaǵı sawda jolı ideyası jáne de áhmiyetli túrge enip atırǵanın atap ótti:
– «Bir mákan, bir jol» joybarı tek ǵana infrastruktura hám ekonomika menen baylanıslı emes, al insaniyattıń ulıwma táǵdiri ideyasına tiykarlanǵan filosofiya da bolıp esaplanadı. Biz hámmemiz «Ullı Jipek jolı»nıń miyrasxorlarımız hám búgingi kúnde ónim emes, al ideya, máni hám isenim shınjırı haqqında sóz etilip atırǵanı simvolikalıq mánige iye. Mámleketler arasındaǵı haqıyqıy jaqınlıq insanıy túsinik hám qızıǵıwshılıqtan baslanadı. Bul processte ǴXQnıń ornı oǵada áhmiyetli.
Kúnniń ekinshi yarımında dógerek sáwbeti túrinde jurnalistlerdiń qatnasıwında media sóylesiw shólkemlestirildi. «Jipek jolı hawazı» atamasındaǵı kishi film kórsetildi.

Ótkir ALIMOV, Abduaziz XIDIROV,
ÓzAnıń xabarshıları
Astana qalası, Qazaqstan.