Ózbekstan Respublikası Prezidenti Shavkat Mirziyoevtiń mirát etiwine bola Italiya Respublikasınıń Bas ministri Jorja Meloni 28-29-may kúnleri rásmiy sapar menen elimizde boldı.

Samarqandtaǵı sapar etiwdiń tiykarǵı ilajları 29-may kúni ótkerildi.
Samarqand qalasındaǵı Kongress orayında Italiya Respublikası Bas ministrin rásmiy kútip alıw máresimi boldı.
Oray aldındaǵı maydanda húrmetli qarawıl sap tarttı.
Ózbekstan Respublikası Prezidenti Shavkat Mirziyoev joqarı mártebeli miymandı shın júrekten kútip alıp, minberge mirát etti.
Áskeriy orkestr eki mámlekettiń gimnlerin atqardı. Jetekshiler húrmetli qarawıl qatarı aldınan ótip, rásmiy delegaciyalardıń aǵzaların qutlıqladı.
Bunnan soń Kongress orayında Ózbekstan Respublikası Prezidenti Shavkat Mirziyoev hám Italiya Respublikası Bas ministri Jorja Melonidiń júzbe-júz hám rásmiy delegaciyalardıń qatnasıwındaǵı sóylesiwleri bolıp ótti.
Eki tárepleme strategiyalıq sheriklik qatnasıqların bunnan bılay da rawajlandırıw hám kóp tárepleme birge islesiwdi keńeytiw máseleleri kórip shıǵıldı.
2023-jıl iyun ayında Rim qalasında bolıp ótken joqarı dárejedegi ushırasıwlarda erisilgen kelisimler izbe-iz ámelge asırılıp atırǵanı qanaatlanıwshılıq penen atap ótildi.
Keyingi jılları tovar almasıw kólemi, sonıń ishinde, jetkerip berilip atırǵan ónimlerdiń túriniń keńeyiwi esabınan derlik úsh esege arttı.
Birgeliktegi kárxana hám joybarlardıń sanı eki esege kóbeydi. Italiyanıń jetekshi kompaniyaları menen metallurgiya, elektrotexnika, awıl xojalıǵı, sharwashılıq, turizm hám basqa da tarawlarda óz-ara paydalı kooperaciya jolǵa qoyılǵan.
Ózbekstan delegaciyası Veneciyadaǵı biyennaleda belsene qatnastı, Florenciyada kórgizbe ótkerildi. Ótken jılı dekabr ayında Rim hám Viarejo qalalarında Ózbekstan mádeniyatı kúnleri bolıp ótti.
Mámleketimizde Turin hám Piza universitetleriniń filialları tabıslı jumıs alıp barmaqta. Aprel ayında rektorlardıń ekinshi forumı nátiyjeli ótti.
Tárepler jedel siyasiy almasıwdı dawam ettiriwdi qollap-quwatladı.
Usı jılı aprel ayında Samarqandta bolıp ótken nátiyjeli sammitke muwapıq Evropa Awqamınıń institutları menen jedel birge islesiw dawam ettiriledi. Ámeliy nátiyjelerge itibar qaratqan halda «Oraylıq Aziya – Italiya» sammitin ótkeriw áhmiyetli ekenligi atap ótildi.
Sawda tarawında bizneske texnikalıq járdem baǵdarlamaların keńeytiwge kelisip alındı. Evropa Awqamı bazarına shıǵıw ushın ózbekstanlı eksportshılardı oqıtıw, Tashkentte birgeliktegi Sertifikaciyalaw orayın shólkemlestiriw, Muwapıqlıqtı bahalaw haqqındaǵı kelisimdi qabıl etiwdi tezlestiriw solardıń qatarına kiredi.
Mámleketimiz basshısı Italiyanıń jetekshi kompaniyaları menen Texnologiyalıq sheriklik baǵdarlamasın iske qosıwdı usınıs etti.
Jeke menshik isbilermenliktiń innovaciyalıq joybarları, oǵada áhmiyetli minerallar hám awıl xojalıǵı shiyki zatın tereń qayta islew, avtomobil qurılısı ushın komplektlewshi bólekler, elektrotexnika, energetika, azıq-awqat, farmacevtika, qurılıs sanaatında joqarı texnologiyalıq ónimler islep shıǵarıw, toqımashılıq, bılǵarı, mebel qurılısı hám basqa da tarmaqlar ushın dizayn orayların shólkemlestiriw tiykarǵı baǵdarlar sıpatında atap ótildi.
Bunday joybarlar Evropa operatorı basqarıwında Tashkent wálayatında shólkemlestiriletuǵın sanaat parkine jaylastırılıwı múmkin.
Joybarlardı qollap-quwatlawdıń jańa mexanizmlerin iske qosıw ushın birgeliktegi investiciyalıq fondtı shólkemlestiriw, sonday-aq, Italiyanıń «SACE» hám «SIMEST» mámleketlik agentliklerin tartıw máselesi kórip shıǵıladı.
Kompleksli «jol kartası» tiykarında awıl xojalıǵında keń kólemli ilimiy-texnologiyalıq birge islesiwdi rawajlandırıwǵa ayrıqsha itibar qaratıldı. Júzim, zaytun, shafran, sparja jetistiriw, agrolaboratoriyalar shólkemlestiriw, biotexnologiyalardı rawajlandırıw hám agroqamsızlandırıwdı engiziw boyınsha kooperaciyalıq perspektivalar atap ótildi.
Jańa joybarlardı alǵa qoyıw maqsetinde Húkimetleraralıq topardıń jumısın qayta tiklew hám onıń májilisin biznes forum menen birge ótkeriwge kelisip alındı.
Ózbekstan hám Italiya aymaqları arasındaǵı sheriklik qatnasıqların keńeytiw sheńberinde Lombardiya gubernatorı Attilio Fontananiń saparı hám birinshi Aymaqlar forumı sheńberinde ámeliy nátiyjelerge erisiw áhmiyetli ekeni atap ótildi.
Bilimlendiriw tarawında mámleketimizde Tushiya universitetiniń filialın, Piza, Trento, Roma Tre hám Ka-Foskari universitetleri menen eki tárepleme diplom baǵdarlamaların iske qosıw rejeleri qollap-quwatlandı.
Ózbekstanda Italiya mádeniyatı kúnlerin ótkeriwge kelisip alındı.
Sapar etiw sheńberinde miynet migraciyası tarawında sistemalı birge islesiwdi jolǵa qoyıwǵa qaratılǵan kelisimge qol qoyılǵanı qanaatlanıwshılıq penen atap ótildi.
Ushırasıw juwmaǵında erisilgen kelisimlerdi ámelge asırıw boyınsha kompleksli «jol kartası»n tayarlaw haqqında qarar qabıl etildi.
Ózbekstan Respublikası Prezidenti Shavkat Mirziyoev hám Italiya Respublikası Bas ministri Jorja Meloni Strategiyalıq sheriklik qatnasıqların bekkemlew haqqındaǵı birgeliktegi deklaraciyanı qabıl etti.
Olardıń qatnasıwında sapar sheńberinde qol qoyılǵan, sonıń ishinde:
– investiciyalardı xoshametlew hám óz-ara qorǵaw haqqında;
– strategiyalıq áhmiyetke iye shiyki zat tarawında birge islesiw haqqında;
– migraciya hám háreketleniw erkinligi tarawında birge islesiw haqqında;
– turaqlı rawajlanıw hám qorshaǵan ortalıqtı qorǵaw, sonday-aq, mádeniy miyrastı saqlaw tarawlarında birge islesiw haqqında;
– Klimat qorı hám Italiya awıl xojalıǵı konfederaciyası menen birge islesiw, «Sogesid» hám «Ansaldo» kompaniyaları menen «jasıl» rawajlanıw tarawında birge islesiw haqqında;
– Tushia, Piza hám Turin universitetleri menen sheriklik haqqındaǵı eki tárepleme kelisimlerdi almasıw máresimi de ótkerildi.
Sonday-aq, rásmiy sapar sheńberinde Italiya Milliy izertlew orayı, «SIMEST» hám «Danieli» kompaniyaları, Peruja universiteti hám basqa da shólkemler menen bir qatar hújjetlerge qol qoyıldı.
Joqarı dárejedegi Ózbekstan – Italiya sóylesiwleri juwmaqlanǵannan soń, Samarqand qalasındaǵı kóshege Rim qalasınıń atın beriwge baǵıshlanǵan saltanatlı máresim ótkerildi.
Ózbekstan Respublikası Prezidenti Shavkat Mirziyoev bul qarar tereń tariyxıy hám mádeniy baylanıslar, strategiyalıq sheriklik qatnasıqlarınıń házirgi joqarı dárejesin esapqa alǵan halda, sonday-aq, Ózbekstan hám Italiya xalıqları arasındaǵı doslıq hám óz-ara húrmet belgisi sıpatında qabıl etilgenin atap ótti.
Bunnan soń Shavkat Mirziyoev hám Jorja Meloni Kongress orayında shólkemlestirilgen «Ózbekstan hám Italiya: civilizaciyalar qarım-qatnası» kórgizbesin tamashaladı.
Biytákirar ekspoziciya eki mámleket arasındaǵı tereń tariyxıy, ilimiy hám mádeniy baylanıslarǵa baǵıshlanǵan. Ol «Rim hám Kushan imperiyalarınıń sawda qatnasıqları», «Birinshi Oyanıw dáwiri», «Marko Polo», «Ámir Temur», «Mırza Ulıǵbek» hám «Zahiriddin Muhammed Babur,» «XIX ásirde Ózbekstandaǵı italiyalılar», «Ekinshi jer júzilik urısta ózbekstanlılardıń Italiyanı azat etiwge qosqan úlesi», «Ózbekstan hám Italiya: mádeniy miyrastı saqlaw» sıyaqlı 9 temadaǵı bólimnen ibarat.
Miymanlarǵa Afrosiyobtıń «Samarqand húkimdarı tárepinen elshilerdi qabıl etiw máresimi» atamasındaǵı diywaldaǵı súwrettiń belgili italiyalı usta Mauro Pelliconni tárepinen Florenciya mozaikası usılında islengen biybaha nusqası kórsetildi.
Sonday-aq, jetekshiler hár qıylı tariyxıy estelikler, grafikalıq súwretler, qoljazba hám miniatyuralar, siyrek ushırasatuǵın ádebiy basılımlar, músinler, arxiv súwretleri hám hújjetleri menen tanıstı.
Ózbekstan Respublikası Prezidenti Shavkat Mirziyoev hám Italiya Bas ministri Jorja Meloni Kongress orayı qıyabanında birgelikte emen ekti.
Máresim eki mámleket xalıqlarınıń doslıǵı, Ózbekstan – Italiya strategiyalıq sheriklik qatnasıqların bunnan bılay da rawajlandırıw hám bekkemlewge bolǵan isenimli umtılısınıń belgisi boldı.
Usınıń menen Italiya Bas ministri Jorja Melonidiń elimizge saparı juwmaqlandı.
Bul sapar etiw Ózbekstan hám Italiya arasındaǵı tariyxıy jaqın baylanıslardı hám strategiyalıq sheriklik qatnasıqların jáne de bekkemlew, joqarı dárejedegi sóylesiwler waqtında erisilgen kelisimlerdi ámelge asırıwda jańa basqıshtı baslap beretuǵınına gúman joq.

Ziyodulla JONIBEKOV,
Ikrom AVVALBOEV,
Ǵolib HASANOV,
ÓzAnıń arnawlı xabarshıları