Qazaqstan Respublikası paytaxtında Astana xalıqaralıq forumı – “AIF – 2025” óz jumısın basladı. Onda 600 ge shamalas sırt el miymanları, sonıń ishinde, jetekshi siyasatshılar, xalıqaralıq shólkemler, korporaciyalar, investorlar hám ilimiy jámiyetshilik wákilleri qatnaspaqta.

70 ten aslam mámleketten kelgen jetekshi málimleme agentlikleri, telekanallar hám basqa da ǵalaba xabar qurallarınıń xızmetkerleri forum jumısın tikkeley sáwlelendirip barmaqta.
Forumnıń ashılıwında Qazaqstan Respublikası Prezidenti Qasım-Jomart Toqaev shıǵıp sóyledi. Astana xalıqaralıq forumı qatnasıwshıların qanaatlanıwshılıq penen qutlıqlaǵan mámleket basshısı bul ushırasıw dúnyada úlken anıqsızlıq húkim súrip atırǵan bir waqıtta ótip atırǵanına itibar qarattı.
“Bul xalıqaralıq qatnasıqlardıń kesilispesi, sheshiwshi dáwiri, dep táriyplewimiz múmkin. Biraq, bul juwmaqtı tariyxshılarǵa tapsırıw kerek. Endi bul jaǵdayǵa qanday múnásibette bolıwımız áhmiyetli,” dedi Q.Toqaev.
Qazaqstan jetekshisi ótken jılǵı maǵlıwmatlarǵa bola, 52 mámleket qurallı soqlıǵısıw jaǵdayında bolǵanın aytıp ótti. Zorlıqtan kórilgen ekonomikalıq shıǵınlar 19 trillion dollarǵa jetken. Bul dúnya jalpı ishki óniminiń shama menen 13,5 procentin quraydı.
– Qazaqstan zamanagóy tınısh emes dúnyaǵa konstruktivlik birge islesiw prizması arqalı qaraydı,-dedi Prezident. – Biz sırtqı siyasatımızda bóliniwden kóre qarım-qatnas ústinligine, sonday-aq, suveren huqıqlardı húrmet etiwge súyenemiz. Milliy maqtanısh hám xalıqlardıń tariyxıy hám mádeniy dástúrlerin mensinbew qabıl etiliwi múmkin emes. Sonıń menen birge, barlıq milliy azshılıqlardıń óz tillerinde sóylew hám óz mádeniyatların rawajlandırıw huqıqın húrmet etiw kerek. Sonıń ushın biz Qazaqstanda “Hár túrliliktegi birlik” principin qatań qorǵaymız.
Forumda Ruanda Respublikası Prezidenti Pol Kagame, Arqa Makedoniya Prezidenti Gordana Silyanovska-Davkova shıǵıp sóyledi hám olar da óz-ara birge islesiw dúnya xalıqları ushın áhmiyetli ekenin ayrıqsha atap ótti.
“AIF -2025″te sırtqı siyasat hám xalıqaralıq qáwipsizlik, energetika hám klimat ózgeriwi, ekonomika hám qarjı sıyaqlı global máseleler tereń tallanadı.
Forum óz jumısın dawam ettirmekte.

Norgul Abduraimova,
ÓzA
(Tashkent – Astana)