Festivalda Qurallı Kúshlerge zárúr bolǵan zamanagóy texnologiyalar, metallurgiya, ximiya sanaatı hám tekstil tarawında eki maqsetke mólsherlengen óndirislik shólkemler, iri kárxanalar hám fizikalıq tárepler jáne oylap tabıwshılar ózleriniń ónimleri menen qatnaspaqta.

Bul haqqında Qorǵanıw ministrligi Málimleme hám ǵalaba kommunikaciyalar departamenti xabar berdi.
Ilajdıń saltanatlı ashılıw máresiminde Ózbekstan Respublikası qorǵanıw ministri, general-mayor Shuhrat Xolmuhamedov shıǵıp sóylep, barlıq qatnasıwshılardı elimizde ekinshi márte ótkerilip atırǵan usı festival menen qutlıqlap, elimizdiń qorǵanıwı ushın óz úlesin qosıp atırǵan isbilermenlerge minnetdarshılıq bildirdi.
Sońǵı jılları Qurallı Kúshlerimiz Joqarǵı Bas Sárkardası Shavkat Mirziyoevtiń basshılıǵında milliy armiyamızdı túp-tiykarınan ózgertiw, áskeriy tarawǵa baylanıslı innovaciyalıq ideyalar menen texnologiyalardı keńnen engiziw, sonday-aq, ilimiy-izertlew, tájiriybe-konstruktorlıq ilajlardı nátiyjeli jolǵa qoyıw baǵdarında keń kólemli ámeliy jumıslar alıp barılıp atırǵanın atap ótiw kerek.
Elimizde zamanagóy qorǵanıw sanaatı tarawında da túpkilikli reformalar ámelge asırılıp, jańa zavod hám kárxanalar qurılıp, zamanagóy texnologiya hám úskeneler alıp kelindi. Ámeldegi áskeriy zavodlarımız modernizaciyalandı. Áskeriy-texnikalıq tarawda 50 ge shamalas mámleket penen birge islesiw ornatılıp, 30 dan aslam aldıńǵı sırt el kompaniyaları menen shártnamalarǵa qol qoyıldı. 40 jergilikli kárxana menen birge islesiw jolǵa qoyıldı. Islep shıǵarılıp atırǵan ónim túrleri 155 ke jetkerilip, xızmet kórsetiw 2,5 esege arttırıldı.
Innovaciyalıq ideyalardı ámeliyatta sınaqtan ótkeriw, jaslar arasında zamanagóy texnologiyalarǵa qızıǵıwshılıqtı jáne de kúsheytiw hám injenerlik tarawlarına keńnen tartıw, islep shıǵarıwshı jergilikli kárxana hám shólkemlerdi qorǵanıw sanaatı tarawına baǵdarlaw maqsetinde, mine, eki jıldan berli, «Jeńis parki» estelik kompleksi aymaǵında qorǵanıw tarawındaǵı innovaciyalıq texnologiyalar festivalı shólkemlestiriledi.
Festivaldıń bıyılǵı ilajları sheńberinde de qorǵanıw sanaatına baylanıslı zamanagóy qural-jaraq hám áskeriy texnikalar, robototexnikalar, ximiya-texnologiyalar, kán-metallurgiya tarawı jáne áskeriy hám eki túrli maqsetke mólsherlengen ónimler kórgizbesi qoyıladı.
Sonday-aq, kórgizbe sheńberinde qatnasıwshı kompaniyalardıń «V2V» biznes ilajları rejelestirilgen. Bunnan tısqarı, festival sheńberinde jaslar arasında «Kiber sport», «Xakerlik sheberi», «Programmalastırıw», «3D modellestiriw texnologiyaları», «Robotlar urısı», «Ushıwshısız ushıw apparatların joybarlastırıw», «Raketamodel», «Dron-reysing» hám «Keleshek transport texnologiyaları robototexnikası» baǵdarlarında jarıslar ótkeriledi.
Programmalastırıw hám robototexnikaǵa qızıǵatuǵın jaslarımız ushın bul festival óz ideyaların ámelge asırıw hám tarawdaǵı bilimlerin jáne de rawajlandırıw jolında birinshi qádem boladı. Festivalda tańlap alınǵan qábiletli jaslar hám puqaralarǵa keleshekte Qorǵanıw sanaatı kárxanaları menen zavodlarında óndiristi jolǵa qoyıwı hám jumısqa ornalasıwı ushın keń imkaniyatlar jaratıladı.
Festival dawamında rejelestirilgen kórgizbe hám jarıslar óz-ara húrmet, salamat báseki, haqıyqıy watansúyiwshilik ruwxında ótiwi hám jarqın máwritlerge bay bolıwı kútilmekte.
Festival ilajları 1-iyunǵa shekem dawam etedi.

I.AVVALBOEV,
ÓzAnıń xabarshısı