«Uzbekistan Airways» AJ tárepinen házirgi waqıtta aymaqlarda ushırasıwlar shólkemlestirilip, jolawshılardıń mashqalalarına sheshim tabıw, xızmetlerdiń sapasın jaqsılaw boyınsha jumısların jetilistiriw maqsetinde xalıqtıń pikir-usınısların úyreniw jumısları alıp barılmaqta.

Usı maqsette Sawda-sanaat palatası Qaraqalpaqstan Respublikası basqarmasında «Uzbekistan Airways» AJ basshıları tárepinen gezektegi kóshpeli qabıllaw ótkerildi.
Soraw-juwap tárizinde bolıp ótken ushırasıwda Ministrler Keńesi, Sawda-sanaat palatası, Turizm basqarması, Jaslar isleri agentligi juwapkerleri, fizikalıq hám yuridikalıq tárepler, aviabilet satıwshı agentlikler, turistlik kompaniyalar, isbilermenlik subektleriniń wákilleri qatnastı.
Aviasatıwlar boyınsha agentlikler hám turistlik shólkemlerdiń wákilleri dúnya tájiriybesine tiykarlanıp jetilisip barıwdı talap etetuǵın máseleler boyınsha ózleriniń kózqarasları menen ortaqlastı. Jolawshı hám júk tasıw menen baylanıslı basqa da máseleler dodalandı. Jolawshılardı táshwishke salatuǵın máselelerdiń kópshiligi óz ornında sheshimin taptı. Qosımsha úyreniliwi kerek múrájatlar aviakompaniyanıń tiyisli shólkemlestiriw bólimlerine ótkerildi.
Ilaj qatnasıwshıları «Uzbekistan Airways» AJ toparına kiretuǵın «Silk Avia” aviakompaniyası negizinde aviatasıwshılar ishki bazarınıń rawajlanıwı haqqında da tolıq maǵlıwmat aldı. Ózbekstan Respublikası ishindegi aviaqatnawlardı kóbeytiw hám puqaralarımızdıń hawa transportında háreketleniwi ushın qolaylı sharayatlar jaratıw aviakompaniyanıń aldına qoyılǵan áhmiyetli wazıypalardıń biri bolıp esaplanadı.
Ushırasıwda qatnasıwshılar «Nókis-Aqtaw», «Nókis-Stambul», «Tashkent-Tórtkúl-Nókis» hám basqa da jónelisler boyınsha aviaqatnawlardı jolǵa qoyıw, onlayn bilet satıp alıwdaǵı mashqalalar, komnaniyaǵa jumısqa kiriw hám basqa da máseleler boyınsha pikir-usınısların bildirip, qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi