Aldın xabar bergenimizdey, Qaraqalpaqstan Respublikası Salıq basqarması tárepinen aymaqlarda kishi hám orta biznesti bunnan bılay da rawajlandırıw, bul baǵdarda olardıń jumısına tosqınlıq etip atırǵan mashqalalardı saplastırıw maqsetinde isbilermenler menen ashıqtan-ashıq sóylesiwler ótkerilmekte.

Gezektegi ushırasıw Bozataw rayonında ótkerildi.
Júzbe-júz sóylesiwde salıq basqarması hám rayon basshıları, qánigeleri qatnasıp, kishi hám orta biznesti bunnan bılay da rawajlandırıw, bul baǵdarda usı tarmaq wákillerine berilgen jeńillikler hám salıq jeńillikleri tuwralı maǵlıwmatlar berildi.
Sonday-aq, salıq uyımları tárepinen jasırın ekonomikanıń aldın alıw, rásmiy emes isbilermenlik jumısın rásmiylestiriw baǵdarında ámelge asırılıp atırǵan jumıslarǵa toqtap ótip, isbilermenlerge salıq jeńillikleri haqqında tolıq túsinikler berildi.
Tıńlanǵan múrájatlardıń kópshiligi óz ornında sheshildi. Qosımsha úyreniw hám talqılaw talap etetuǵın múrájatlar boyınsha juwapkerlerge tiyisli tapsırmalar berildi hám olardıń orınlanıwı qadaǵalawǵa alındı.
Isbilermenler menen ashıq pikirlesiw ilajları orınlarda dawam etpekte.

Qaraqalpaqstan xabar agentligi.