Ózbekstannıń Iordaniyaǵa jańadan tayınlanǵan elshisi Nodirjon Turǵunov 28-may kúni usı mámleket Sırtqı isler hám sırt eldegi watanlaslar menen islesiw ministrliginiń bas xatkeri Majid al-Qatarnaǵa isenim jarlıqlarınıń nusqaların tapsırdı.

“Dúnyo” MAnıń xabar beriwinshe, sóylesiw waqtında Ózbekstan-Iordaniya qatnasıqların jedellestiriw, sonday-aq, BMSh, Islam birge islesiw shólkemi sıyaqlı xalıqaralıq shólkemler sheńberindegi óz-ara birge islesiw máseleleri dodalandı. Eki dos mámleket arasında bekkem tariyxıy hám mádeniy baylanıslar bar ekenligi ayrıqsha atap ótilgen.
“Siyasiy sóylesiwdi keńeytiw perspektivaları, sonıń ishinde, hár qıylı dárejedegi óz-ara saparlardı shólkemlestiriw hám birgeliktegi ilajlar, atap aytqanda, sırtqı isler ministrlikleri arasında siyasiy másláhátlesiwler hám húkimetleraralıq komissiya májilislerin ótkeriw arqalı dodalandı,” – dep qosımsha etiledi xabarda.
Sonday-aq, ushırasıwda tárepler sawda-ekonomikalıq birge islesiwdi rawajlandırıw, sonıń ishinde, isbilermen toparlar arasındaǵı baylanıslardı jedellestiriw hám birgeliktegi investiciyalıq joybarlardı ámelge asırıwdan óz-ara mápdar ekenligin bildirdi. Ekonomikalıq diplomatiyanı jedel alǵa qoyıw boyınsha anıq usınıslar kórip shıǵıldı. Mádeniy-gumanitarlıq baylanıslardı keńeytiw, turistlik almasıwdı kóbeytiwge ayrıqsha itibar qaratıldı. Xalıq diplomatiyasın bekkemlewdiń áhmiyetli quralı sıpatında Ózbekstan hám Iordaniya paytaxtlarında Mádeniyat kúnlerin ótkeriw zárúr ekenligi atap ótildi.
Maǵlıwmat ushın, Ózbekstan hám Iordaniya arasında diplomatiyalıq qatnasıqlar 1993-jılı 15-fevralda ornatılǵan.
Esletip ótemiz, Nodirjon Turǵunov Ózbekstannıń Saudiya Arabstanındaǵı elshisi sıpatında 2024-jıl mart ayında Ar-Riyod qalasına kelgen. 2025-jıl aprel ayında bolsa ol bir waqıttıń ózinde mámleketimizdiń birinshi elshisi sıpatında Baxreyn Sırtqı isler ministrligine isenim jarlıqlarınıń nusqaların tapsırǵan edi.

Qaraqalpaqstan xabar agentligi