28-may kúni Tashkent qalasında Ózbekstan Respublikası Oliy Majlisi Senatınıń jetinshi jalpı májilisi óz jumısın basladı.
Onda Senat, húkimet aǵzaları, ministrlik hám uyımlardıń wákilleri, jergilikli Keńeslerdiń deputatları, Senat janındaǵı Jaslar parlamenti aǵzaları hám ǵalaba xabar qurallarınıń xızmetkerleri qatnastı.

Videokonferencbaylanıs túrinde ótkerilgen jalpı májilisti Ózbekstan Respublikası Oliy Majlis Senatı Baslıǵı Tanzila Norboeva alıp bardı.
Jalpı májilis Senatınıń YouTube tarmaǵındaǵı beti arqalı tikkeley sáwlelendirip barıldı.
Senattıń jetinshi jalpı májilisiniń birinshi kúninde dáslep «Haywanlardı identifikaciyalaw, dizimge alıw hám baqlaw haqqında»ǵı nızam kórip shıǵıldı.
Atap ótilgenindey, sońǵı jıllarda mámleketimizde sharwashılıqtı rawajlandırıw, azıq-awqat qáwipsizligin támiyinlew hám tarawdı mámleket tárepinen qollap-quwatlawǵa ayrıqsha itibar qaratılmaqta.
Bunnan tısqarı, tarawǵa óndiristiń zamanagóy usılların keńnen engiziw arqalı qosımsha qun shınjırın jaratıw, málimleme-kommunikaciya texnologiyaları hám ilim jetiskenliklerinen nátiyjeli paydalanıw máseleleri de úlken áhmiyetke iye.
Biraq házirgi waqıtta haywanlardı identifikaciyalaw jumısları tolıq ámelge asırılmay atırǵanı olarda qáwipli juqpalı keselliklerge qarsı profilaktikalıq shanshıw ilajların ótkeriw hám epizootikalıq turaqlılıqtı kepillikli saqlaw imkaniyatın sheklemekte.
Sonday-aq, identifikaciya processleri sanlastırılmaǵanı, maǵlıwmatlar bazası oraylastırılmaǵanı nátiyjesinde haywanlardıń anıq esabın júrgiziwdegi mashqalalar da saqlanıp kelmekte.
Usı nızamda Awıl xojalıǵı ministrligi janındaǵı Veterinariya hám sharwashılıqtı rawajlandırıw komiteti haywanlardı identifikaciyalaw, dizimge alıw hám baqlaw tarawındaǵı wákillikli uyım etip belgilenbekte.
Sonday-aq, wákillikli mámleketlik uyım wákiliniń hám haywan iyesiniń huqıqları menen minnetleri anıq kórsetip ótilmekte. Haywanlardı identifikaciyalaw, dizimge alıw hám baqlawǵa baylanıslı ulıwma talaplar hám múddetler belgilenbekte.
Xaywanlardı identifikaciyalaw, dizimge alıw, baqlaw hám esaptan shıǵarıw boyınsha ilajlardı shólkemlestiriw, elektron málimleme sistemasın muwapıqlastırıw hám real waqıt rejiminde elektron málimleme almasıwın támiiynlew Haywanlardı identifikaciyalaw, dizimge alıw hám baqlaw orayınıń wákilligi etip belgilenbekte.
Senatorlar tárepinen atap ótilgenindey, nızamnıń qabıl etiliwi nátiyjesinde haywanlardıń esabı, olardıń násili hám densawlıǵı haqqındaǵı birden-bir elektron bazası qáliplesedi, sonday-aq, haywanlardıń saqlanıwı hám háreketleri (minraciyası) tártipke salınadı hám turaqlı monitoring etiw sisteması jaratıladı.
Bunnan tısqarı, haywanlardıń qáwipli juqpalı keselliklerge tolıq profilaktikalıq shanshılıwına erisiledi. Nátiyjede haywanlardıń túrli juqpalı keselliklerge shatılıwı hám nabıt bolıwınıń aldı alınadı. Respublikada epizootikalıq hám epidemiyalıq turaqlılıq támiyinlenedi.
Dodalaw juwmaǵında bul nızam senatorlar tárepinen maqullandı.
Senattıń jalpı májilisinde «Ózbekstan Respublikasınıń Salıq kodeksine qosımsha hám ózgerisler kirgiziw haqqında»ǵı nızam dodalandı.
Keyingi jıllarda mámleketimizde mámleketlik xızmetlerdi kórsetiwde byurokratizm hám hákimshilik tosqınlıqlardı saplastırıw, sonıń ishinde, xalıqtıń aralıqtan turıp elektron mámleketlik xızmetlerden erkin túrde paydalanıw imkaniyatların keńeytiw, sonday-aq, xalıq hám isbilermenlerdi qollap-quwatlaw hám salıq hákimshiligin jáne de jetilistiriw boyınsha keń kólemli jumıslar ámelge asırılmaqta.
Sonıń menen birge, aralıqtan turıp elektron mámleketlik xızmetlerden erkin paydalanıw hám zárúr hújjetlerdi elektron túrde rásmiylestiriwden keńnen paydalanıwdı jáne de qollap-quwatlaw, onıń huqıqıy tiykarların bekkemlew zárúrligi payda bolmaqta.
Sonıń ushın Salıq kodeksine elektron hújjette onı qol qoyǵan shaxstıń kelisimin kórsetetuǵın hám onı identifikaciyalaw imkaniyatın beretuǵın elektron tastıyıqlaw usıllarınan paydalanıwǵa tolıq ózgerisler kirgizilmekte.
Bunnan tısqarı, artıqsha óndirilgen salıqlardı salıq tólewshiniń arzasına muwapıq kelesi tólemler esabınan kirgiziw múddeti 15 kúnnen 3 kúnge qısqartılıp, CHernobıl AES apatshılıǵınıń aqıbetlerin saplastırıwda qatnasqan puqaralardıń, sonday-aq, olardıń ómirlik joldasınıń miynet haqısı hám basqa dáramatları tolıq dáramat salıǵınan azat etilmekte.
Senatorlar óziniń shıǵıp sóylegen sózlerinde dodalanǵan nızamda aralıqtan turıp elektron mámleketlik xızmetlerinen paydalanıwdı qollap-quwatlaw, sonday-aq, artıqsha óndirilgen salıq summasın salıq tólewshiniń basqa salıqlar boyınsha kelesi tólemleri esabınan esapqa alıw táribin jáne de ápiwayılastırıw, ayırım kategoriyadaǵı shaxslarǵa salıq jeńilliklerin beriw óz kórinisin tapqanın atap ótti.
Bul nızam senatorlar tárepinen maqullandı.
Bunnan soń, májiliste “Ózbekstan Respublikasınıń Hákimshilik juwapkershilik haqqındaǵı kodeksine ózgerisler hám qosımshalar kirgiziw haqqında”ǵı nızam senatorlar tárepinen dodalandı.
Atap ótilgenindey, mámleketimizde insan, onıń ómiri, erkinligi, abırayı hám qádiri joqarı qádiriyat esaplanǵan insanıylıq demokratiyalıq mámleketti qurıw baǵdarında sistemalı reformalar ámelge asırılmaqta.
Bul reformalar nátiyjesinde Ózbekstan Respublikası Konstituciyasında da insan, sonıń ishinde, jábirleniwshi huqıqlarınıń kepillikleri belgilengen.
Bul nızam da áne, usı sistemalı reformalardıń logikalıq dawamı bolıp esaplanadı. Búgingi kúnde ayırım hákimshilik huqıqbuzarlıqlar sociallıq áhmiyetin joyıtqan hám olardıń sanı keskin azayǵan. Sonıń menen birge, Hákimshilik juwapkershilik haqqındaǵı kodekstiń bir neshe statyasında bir hákimshilik huqıqbuzarlıq ushın juwapkershilik belgilengen. Sonıń ushın bul nızam olardı muwapıqlastırıw maqsetinde islep shıǵılǵanlıǵı atap ótildi.
Bul nızam menen Ózbekstan Respublikasınıń Hákimshilik juwapkershilik haqqındaǵı kodeksine ayırım huqıqbuzarlıqlar ushın qılmıstıń ózgesheliginen, jazalawdan gózlengen maqsetke erisiw ushın jeterlilik kózqarasınan kelip shıqqan halda hákimshilik juwapkershilikti biykarlawǵa qaratılǵan tiyisli ózgerisler kirgizilmekte.
Sonday-aq, bir qılmıs, yaǵnıy temeki ónimin belgilenbegen orınlarda paydalanǵanı ushın Hákimshilik juwapkershilik haqqındaǵı kodekstiń hár qıylı statyalarında názerde tutılǵan juwapkershilik óz aldına statyada (561-statya) sáwlelendirilmekte.
Bunnan tısqarı, Kodekstiń ayırım statyalarında názerde tutılǵan huqıqbuzarlıqlar menen baylanıslı islerdi kóriwge jábirleniwshiniń arzası bolǵan jaǵdayda ǵana jol qoyılatuǵını belgilenbekte.
Hákimshilik juwapkershilik haqqındaǵı kodekstiń basqa statyalarına da joqarıdaǵı ózgerisler hám qosımshalardan jáne Jańa Ózbekstan hákimshilik reformalar baǵdarlamasınan kelip shıqqan halda tiyisli ózgerisler kirgizilmekte.
Senatorlardıń atap ótkenindey, bul nızamnıń qabıl etiliwi menen insan huqıqları kepillikleriniń kúsheyiwine, huqıqıy tásir ilajların qollanıwda teń salmaqlılıq principine ámel etiliwiniń támiyinleniwine hám juwapker mámleketlik uyımlardıń jumıs júklemesiniń azayıwına, puqaralar arasındaǵı ayırım kelispewshiliklerdiń sudqa shekem sheshiliwine erisiledi.
Nızam senatorlar tárepinen maqullandı.
Sonday-aq, “Ózbekstan Respublikasınıń ayırım nızam hújjetlerine salıq hám isbilermenlik tarawındaǵı huqıqıy qatnasıqlardı jetilistiriwge qaratılǵan ózgerisler hám qosımshalar kirgiziw haqqında”ǵı nızam kórip shıǵıldı.
Atap ótilgenindey, sońǵı jılları elimizde isbilermenlik jumısı ushın qolaylı sharayatlar jaratıw, salıq siyasatın jetilistiriw arqalı salıq júgin azaytıw, ekonomikanı jedel rawajlandırıw baǵdarında izbe-iz reformalar alıp barılmaqta.
Sonıń menen birge, usı reformalar sheńberinde ámelge asırılıp atırǵan ilajlar salıq tarawındaǵı huqıqbuzarlıqlardıń aldın alıwǵa, jınayat isleri sheńberinde isbilermenlik subektleriniń huqıqıy qorǵalıwın kúsheytiwge qaratılǵan huqıqıy mexanizmlerdi jáne de jetilistiriw zárúrligin payda etpekte.
Usı maqsette islep shıǵılǵan bul nızam menen Jınayat kodeksine, Hákimshilik juwapkershilik haqqındaǵı kodekske salıq tarawındaǵı huqıqbuzarlıqlar ushın juwapkershilikti kúsheytiw, salıqlardı yamasa jıyımlardı tólewden bas tartqanlıq ushın juwapkershilikke sebep bolatuǵın zıyannıń muǵdarın arttırıw, jetkerilgen zıyannıń ornı sudqa shekemgi basqıshta hám sud dodalawı dawamında tolıq qaplanǵan jaǵdayda juwapkershilikten azat etiw, sonday-aq, wákillikli uyımlardıń tergewge shekem tekseriw háreketlerin ámelge asırıw hám hákimshilik huqıqbuzarlıqlardı kórip shıǵıwǵa baylanıslı wákilliklerin anıqlastırıwǵa qaratılǵan ózgerisler hám qosımshalar kirgizilmekte.
Jınayat-processual kodeksine isbilermenlik subektlerine qarsı qozǵatılǵan jınayat isleri boyınsha sorastırıw, dáslepki tergew yamasa sud procesinde Biznes-ombudsman yamasa Sawda-sanaat palatası tárepinen tayınlanǵan wákil jámietlik qorǵawshı sıpatında qatnasıwın belgileytuǵın qaǵıydalar kirgizilmekte.
Bunnan tısqarı, Puqaralıq kodeksinde hám Salıq kodeksinde sud qarar shıǵarǵanǵa shekem tergew procesinde qosımsha esaplanıp óndirilgen salıqlar hám jıyımlar boyınsha penya esaplanbawı, jámiyetlik mútájlikler ushın alıp qoyılǵan jer uchastkası boyınsha tólep berilgen kompensaciya pulları dáramat salıǵına tartılmawı sıyaqlı ózgerisler de názerde tutılmaqta.
Senatorlar ózleriniń shıǵıp sóylewlerinde atap ótkenindey, bul nızam salıq tarawındaǵı huqıqbuzarlıqlardıń aldın alıwǵa, salıq túsimleriniń turaqlılıǵın támiyinlewge, isbilermenlikti rawajlandırıw ushın teńdey báseki sharayatların jaratıwǵa, isbilermenlerdiń nızamlı máplerin isenimli qorǵaw kepilliklerin kúsheytiwge xızmet etedi.
Dodalawdan soń bul nızam senatorlar tárepinen maqullandı.
Bunnan tısqarı, “Ózbekstan Respublikasınıń ayırım nızam hújjetlerine qosımshalar hám ózgerisler kirgiziw haqqında”ǵı nızam kórip shıǵıldı.
Atap ótilgenindey, keyingi jıllarda mámleketimizde puqaralardıń huqıqları hám nızamlı mápleri qorǵalıwın támiyinlewge hám huqıqbuzarlıqlardıń aldın alıwǵa, tutınıwshılardıń huqıqları hám nızamlı mápleri isenimli qorǵalıwına, sonday-aq, yod jetispewshiligi keselliklerin profilaktika etiwge hám olardıń aldın alıwǵa qaratılǵan sistemalı jumıslar alıp barılmaqta.
Sonıń menen birge, talan-tarajlıq, ishki isler uyımları xızmetkeriniń hám Ózbekstan Respublikası Milliy gvardiyası áskeriy xızmetkeriniń nızamlı talapların orınlamaǵanı ushın jaza ilajların kúsheytiw, sonday-aq, sawda tarawında tutınıwshılardıń huqıqları qorǵalıwın támiyinlew ushın qosımsha sharayatlar jaratıw, tutınıw bazarın yoddlanǵan duz hám yodlanǵan azıq-awqat ónimleri menen tolıqtırıwǵa baylanıslı ilajlar kóriw zárúrligi júzege kelmekte.
Sol sebepli bul nızam menen Ózbekstan Respublikasınıń Hákimshilik juwapkershilik haqqındaǵı kodeksi, “Tutınıwshılardıń huqıqların qorǵaw haqqında”ǵı jáne “Yod jetispewshiligi kesellikleriniń profilaktikası haqqında”ǵı nızamlarǵa tiyisli ózgerisler kirgizilmekte.
Atap aytqanda, Hákimshilik juwapkershilik haqqındaǵı kodekske energiya resursların kishi muǵdarda talan-taraj etiw hám ishki isler uyımları xızmetkeriniń hám Ózbekstan Respublikası Milliy gvardiyası áskeriy xızmetkeriniń nızamlı talapların orınlamaw menen baylanıslı huqıqbuzarlıqlar kirgizilmekte.
Sonday-aq, “Tutınıwshılardıń huqıqların qorǵaw haqqında”ǵı Ózbekstan Respublikası nızamına satıwshılardı aldı-sattı shártnamasında kórsetilgen minnetlemelerdi óz waqtında orınlawǵa shaqıratuǵın normalardı belgilewshi qosımsha kirgizilmekte.
Atap ótilgenindey, 2024-jılı Básekini rawajlandırıw hám tutınıwshılardıń huqıqların qorǵaw komitetine tutınıwshılardan kelip túsken 30 070 múrájattıń 4 213 inde satıwshılar tárepinen tovarlar (avtomobil, turmıslıq texnika, tayar awqat, mebel hám basqalar) kelisilgen múddetlerde jetkerip berilmegeninen narazı bolǵan.
Bunnan tısqarı, tek ǵana avtomobildiń aldı-sattı shártnamalarında kórsetilgen múddetlerge ámel etiliwi sistemalı túrde úyrenilgende 5 332 jaǵdayda satıwshılar tárepinen avtomobillerdi jetkerip beriw múddetleri buzılǵanı anıqlanǵan.
Nızam menen aldı-sattı shártnamasına muwapıq satıwshı shártnamada belgilengen múddette tovardı tutınıwshıǵa jetkerip bermegen jaǵdayda satıwshı keshiktirilgen hár bir waqıt birligi (shártnamada kórsetilgen minut, saat, kún) ushın minnetlemeniń orınlanbaǵan bóleginiń 0,5 procenti muǵdarında tutınıwshıǵa penya tólewi, biraq onda penyanıń ulıwma summası tapsırılmaǵan tovardıń bahasınan artıp ketpewi kerek ekenligi anıq belgilep qoyılmaqta.
Bunnan tısqarı, “Yod jetispewshiligi kesellikleriniń profilaktikası haqqında”ǵı Ózbekstan Respublikası nızamına elimizde tek ǵana yodlanǵan as duzın islep shıǵarıwdı, alıp kiriliwin hám realizaciyalanıwın, azıq-awqat ónimlerin islep shıǵarıwda yodlanǵan duzdan májbúriy túrde paydalanılıwın, sonday-aq, Ózbekstan Respublikası Densawlıqtı saqlaw ministrliginiń as duzın hám azıq-awqat ónimlerin yodlawǵa, yodlanǵan duzdıń aylanısına baylanıslı sanitariyalıq qaǵıydalar, normalar hám gigienalıq normativlerdi belgilew tarawındaǵı wákillikleri anıqlastırılıwın názerde tutatuǵın ózgerisler kirgizilmekte.
Senatorlar tárepinen nızamnıń qabıl etiliwi mámleketimizde nızam ústinligin támiyinlewge, tutınıwshılardıń huqıqları menen nızamlı mápleriniń qorǵalıwın támiyinlew boyınsha qosımsha huqıqıy tiykarlardı jaratıwǵa, sonday-aq, xalıqtıń densawlıǵın saqlawǵa xızmet etetuǵını atap ótildi.
Nızam senatorlar tárepinen maqullandı.
Sonıń menen birge, «Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında»ǵı nızam dodalandı.
Atap ótiliwinshe, sud jumısı hám ádil sudlaw nátiyjeliligin arttırıwǵa qaratılǵan izbe-iz reformalar sudlar jumısında ashıq-aydınlıqtı támiyinlewge keń imkaniyat berdi. Reformalar nátiyjesinde sud hákimiyatınıń ashıq-aydınlıǵı aldınǵı xalıqaralıq standartlarǵa muwapıqlastırıldı.
Sonıń ishinde, xalıq penen ashıq pikirlesiwler jolǵa qoyıldı, kóshpeli sud májilisleriniń kólemi arttırıldı, sudlardıń jámiyetshilik hám ǵalaba xabar quralları menen birge islesiw baylanısları jańa basqıshqa alıp shıǵıldı.
Ashıq sud májilislerinde barlıq puqaralarǵa hesh qanday tosqınlıqlarsız qatnasıw imkaniyatları berildi. Sud qararları hesh kimnen jasırılmastan onlayn tárizde járiyalanbaqta.
Sonıń menen birge, mámleketimizde shaxstıń huqıqları menen erkinliklerin isenimli qorǵaw, onıń abırayı hám qádir-qımbatın húrmet etiw nızam hújjetleri menen bekkemlengen.
Sonıń ishinde, Konstituciyanıń 31-statyasında hár bir insan jeke turmısına qol qatılmaslıǵı, jeke hám shańaraqlıq sırǵa iye bolıw, óziniń abırayı hám qádir-qımbatın qorǵaw huqıqına iye ekeni bekkemlendi. Sonday-aq, shaxsqa baylanıslı maǵlıwmatlardı qorǵaw huqıqına iye ekenligi Konstituciya dárejesinde tán alınǵan.
Jabıq sud májilislerin ótkeriwge baylanıslı da bir qatar normativlik-huqıqıy hújjetler qabıl etilip, olardı ótkeriw tártibi hám múddetleri anıq belgilengenin atap ótiw kerek.
Nızam huqıqıy reformalardıń logikalıq dawamı bolıp, onda Jınayat kodeksi, Jınayat-processuallıq kodeksi, Puqaralıq processuallıq kodeksi, Ekonomikalıq processuallıq kodeks hám Hákimshilik sud islerin júrgiziw haqqındaǵı kodekske jabıq sud maǵlıwmatların járiyalamaw boyınsha sud dodalawı qatnasıwshılarına tiyisli minnetleme júklew hám onı buzǵanı ushın jınayıy juwapkershilikti belgilew názerde tutılmaqta.
Sonıń ishinde, nızam menen Jınayat kodeksiniń 239-statyasınıń ataması sorastırıw, dáslepki tergew yamasa sud májilisi maǵlıwmatların járiyalaw dep tolıqtırılıp, sorastırıwshı, tergewshi, prokuror yamasa sudtıń ruxsatısız sorastırıw, dáslepki tergew yamasa sud maǵlıwmatların járiyalamaw haqqında minnetleme júklengen shaxs tárepinen járiyalaǵanı ushın juwapkershilik belgilenbekte.
Sonday-aq, Jınayat-processuallıq kodeksine jańa statya menen Puqaralıq processuallıq hám Ekonomikalıq processuallıq kodeksleri, sonday-aq, Hákimshilik sud islerin júrgiziw haqqındaǵı kodekstiń “Sud májilisi”ne baylanıslı statyaları jańa bólim menen tolıqtırılıp, isti jabıq sud májilisinde kóriwde sud májilisinde qatnasıp atırǵan shaxslar sud dodalawınıń maǵlıwmatların hám detalların sudtıń ruqsatısız járiyalamaw haqqında eskertilip, olardan tilxat alınıwı hám tilxatta usı minnetlemeni buzǵanı ushın Jınayat kodeksiniń 239-statyasına bola juwapkershilik haqqındaǵı eskertiw de sáwlelendiriliwi bekkemlep qoyılmaqta.
Senatorlar bul nızamnıń turmısqa engiziliwi sud procesinde shaxstıń huqıqları menen erkinliklerin qorǵaw kepilliklerin bunnan bılay da kúsheytiwge, sud dodalawı qatnasıwshılarınıń jeke turmısı haqqındaǵı maǵlıwmatlardıń járiyalanıwınıń aldın alıwǵa xızmet etetuǵının atap ótti.
Nızam senatorlar tárepinen maqullandı.
Bunnan keyin “Ózbekstan Respublikasınıń ayırım nızam hújjetlerine jınayat procesinde májbúrlew ilajları institutınıń jetilistirilip atırǵanlıǵı múnásibeti menen qosımshalar hám ózgerisler kirgiziw haqqında”ǵı nızam senatorlar tárepinen dodalandı.
Atap ótilgenindey, sońǵı jılları elimizde insan huqıqları menen erkinliklerin isenimli qorǵaw sistemasın jaratıwǵa, “Insan qádiri ushın” principi tiykarında onı jańa basqıshqa kóteriwge, sud uyımları hám huqıq qorǵaw uyımlarınıń jumısında shaxstıń huqıqları menen erkinliklerin qorǵaw kepilliklerin kúsheytiwge, sonday-aq, xalıqtıń huqıq qorǵaw sistemasına bolǵan isenimin bunnan bılay da bekkemlewge qaratılǵan keń kólemli reformalar alıp barılmaqta.
Bul nızam da áne usı sistemalı reformalardıń logikalıq dawamı bolıp, “Ózbekstan – 2030” strategiyasında belgilengen wazıypalardıń orınlanıwın támiyinlew maqsetinde islep shıǵılǵanlıǵı atap ótildi.
Nızam menen Jınayat-processuallıq kodeksine hám “Prokuratura haqqında”ǵı hám “Sudlar haqqında”ǵı nızamlarǵa bir qatar qosımshalar hám ózgerisler kirgizilmekte.
Sonıń ishinde, Jınayat-processuallıq kodeksi jańa bap penen tolıqtırılıp, onda Ózbekstan Respublikasınan shıǵıw huqıqın waqtınsha sheklewdiń maqseti hám tiykarları, Ózbekstan Respublikasınan shıǵıw huqıqın waqtınsha sheklew haqqında ótinish xatın qozǵatıw, bunday ótinish xattı kórip shıǵıw, sud uyǵarıwı, Ózbekstan Respublikasınan shıǵıw huqıqın waqtınsha sheklew yamasa sheklewdi biykarlaw sıyaqlı normalar bayan etilgen.
Bunnan tısqarı, “Sudlar haqqında”ǵı hám “Prokuratura haqqında”ǵı nızamlarǵa sudlar tárepinen pasporttıń (háreketleniw hújjetiniń) ámel etiwin toqtatıp turıw haqqındaǵı ótinish xatın kórip shıǵıw, sonday-aq, prokurorlar tárepinen pasporttıń (háreketleniw hújjetiniń) ámel etiwin toqtatıp turıw haqqındaǵı ótinish xatın kórip shıǵıw hám kelisim berilgen jaǵdayda sudlarǵa kirgiziwdi názerde tutatuǵın qosımsha kirgizilmekte.
Atap ótilgenindey, bul nızam puqaralardıń huqıqları menen erkinlikleriniń isenimli qorǵalıwın támiyinlewge, ádil sudlawdıń sapasın bunnan bılay da arttırıwǵa qaratılǵanı menen áhmiyetli.
Dodalaw juwmaǵında nızam senatorlar tárepinen maqullandı.
Jalpı májiliste “Salıq hám byudjet nızamshılıǵınıń jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam kórip shıǵıldı.
Atap ótilgenindey, mámleketimizde salıq hám byudjet nızamshılıǵın jetilistiriw, salıq haqqındaǵı nızamshılıq talapların ápiwayılastırıw hám salıq hákimshiliginiń jańa hám nátiyjeli quralların engiziw jolı menen isbilermenlik subektlerine salıq júgin azaytıw, sonday-aq, mámleketlik finanslıq qadaǵalaw uyımlarınıń jumısın jetilistiriwge qaratılǵan ilajlar izbe-iz ámelge asırılmaqta.
Nızam menen Byudjet kodeksine gezektegi jıl ushın Ózbekstan Respublikasınıń Mámleketlik byudjet haqqındaǵı nızam joybarın hám Byudjetnamanı parlamentke kirgiziw múddeti belgileniwin, jámiyetshilik pikiri tiykarında qáliplestirilgen ilajlardı qarjılandırıw haqqındaǵı málimleme rásmiy veb-saytlarǵa, “Ashıq byudjet” málimleme portalına jaylastırılıwın názerde tutatuǵın ózgerisler hám qosımshalar kirgizilmekte.
Bunnan tısqarı, Salıq kodeksine byudjet shólkemlerine ijaraǵa berilgen jer uchastkalarınan salıq óndiriw tártibin, ijaraǵa beriwshi yamasa ijaraǵa alıwshı tárepinen jer salıǵın tólew tártibin, sonday-aq, ayırım tarawlarda jumıs alıp barıp atırǵan isbilermenlik subektleri ushın salıq jeńilliklerin beriwdi hám basqa da máselelerdi kirgiziw de názerde tutılǵan.
Biraq bul nızamda qayta kórip shıǵılıwı lazım bolǵan ayırım máseleler bar ekenligi senatorlar tárepinen ayrıqsha atap ótildi.
Sonıń ishinde, biyǵárez járdem sheńberinde kelgen medicinalıq ásbap-úskenelerden tólemli xızmetler kórsetiw máselesin qayta kórip shıǵıw zárúr ekenligine itibar qaratıldı.
Sonday-aq, Mámleketlik byudjetti parlament tárepinen qabıl etiw hám maqullawdıń qatań múddetlerin belgilew zárúrligi de atap ótildi.
Dodalaw dawamında ayırım nızam normaların sońǵı qabıl etilgen nızamshılıq hújjetlerinen kelip shıǵıp, qayta kórip shıǵıw hám jetilistiriw zárúr ekenligi de atap ótildi.
Usılardı inabatqa alıp, nızamdı qayta kórip shıǵıw maqsetke muwapıqlıǵı haqqında Senat qararı qabıl etildi.
Usınıń menen Ózbekstan Respublikası Oliy Majlisi Senatınıń jetinshi jalpı májilisiniń birinshi jumıs kúni juwmaqlandı.

Ózbekstan Respublikası
Oliy Majlisi Senatınıń
Málimleme xızmeti