Ózbekstan delegaciyasınıń Moskvaǵa saparı sheńberinde Rossiya Federaciyası Prezidenti Administraciyası Basshısınıń orınbasarı – Prezident Baspasóz xatkeri Dmitriy Peskov hám Ózbekstan Respublikası Prezidentiniń baspasóz xatkeri Sherzad Asadovtıń ushırasıwı bolıp ótti.

Bul haqqında Sherzad Asadov óziniń telegram kanalında jazbaqta.
«Málimleme tarawındaǵı birge islesiw hám taraw ushın qánigeler tayarlawdıń áhmiyetli máseleleri hám perspektivaları dodalandı.
Mámleketlerimiz basshılarınıń baspasóz xızmetleriniń jumısın muwapıqlastırıw, professional tájiriybe hám strategiyalıq kommunikaciyalarǵa baylanıslı pikirler almasıw máselelerine ayrıqsha itibar qaratıldı. Tez ózgeriwsheń media ortalıq hám sanlı platformalardıń áhmiyeti artıp baratırǵan sharayatta xızmetkerlerdiń mamanlıǵın arttırıw áhmiyetli ekenligi atap ótildi.
Sonday-aq, keleshektegi ayırım rejeler, sonıń ishinde, málimleme siyasatı hám eki tárepleme kún tártibin media jaǵınan qollap-quwatlaw boyınsha birgeliktegi joybarlardı iske qosıw máseleleri kórip shıǵıldı. Ashıq sóylesiw, professional birge islesiw hám sheriklik baylanısların bekkemlewge umtılıw birdey ekeni tastıyıqlandı», delinedi xabarda.

Qaraqalpaqstan xabar agentligi