Húrmetli Forum qatnasıwshıları!

Húrmetli miymanlar!

Bárinen burın, sizlerdi «Sanlı texnologiyalar dáwiri: keleshekke huqıqıy názer» temasındaǵı “Tashkent Law Spring” IV xalıqaralıq yuridikalıq forumnıń ashılıwı menen shın kewlimnen qutlıqlayman.
Ánjumanda dúnyanıń abıraylı shólkemleri hám 40 tan aslam mámleketten joqarı mártebeli delegatlar, jetekshi joqarı oqıw orınları hám «aqıl orayları»nıń belgili ilimpazları menen ekspertleri qatnasıp atırǵanı onıń abırayı hám áhmiyeti barǵan sayın artıp atırǵanın ayqın kórsetpekte.
Joqarı texnologiyalıq rawajlanıw procesinde insan mápleri hám ádillik principlerine ámel etiw, nátiyjeli huqıqıy mexanizmlerdi jaratıw, sanlı suverenitetti támiyinlew boyınsha xalıqaralıq birge islesiwdi hár tárepleme kúsheytiwdi dáwirdiń ózi talap etpekte.
Texnologiyalar hám virtual qatnasıqlar jedellik penen turmısımızǵa kirip atırǵan búgingi kúnde jasalma intellekt sıyaqlı rawajlanıwdıń eń aldınǵı jetiskenliklerin ulıwma insaniyat mápleri jolında aqılǵa uǵras hám nátiyjeli paydalanıw zárúr, dep esaplaymız.
Jańa Ózbekstanda sanlı texnologiyalar járdeminde mámleketlik basqarıwdı modernizaciyalaw hám mámleketlik xızmetlerdi elektronlastırıw, ashıq-aydınlıqtı támiyinlew esabınan “xızmet kórsetiwshi mámleket” principin ámelge asırıwǵa úlken itibar berilmekte.
Ápiwayı adamlarǵa keńnen qolaylıqlar jaratıp atırǵan jasalma intellekt turmısımızǵa tereń kirip barmaqta. Sonı esapqa alıp, biz Jasalma intellekt texnologiyaların 2030-jılǵa shekem rawajlandırıw strategiyasın qabıl ettik, onlayn-rejimde isleytuǵın platformalar hám integraciyalasqan bilimler bazaların iske qostıq.
Jeke qol qatılmaslıq huqıqı hám rawajlanıw talapları arasında názik teńsalmaqlıqtı tabıw, intellektuallıq múlkti qorǵaw, tarawda qolaylı investiciyalıq ortalıqtı támiyinlew, sonday-aq, jańa waqıya – “sanlı dúnya” sharayatında mámleketlerdiń huqıqıy transformaciya processlerine tabıslı ótiwi, ásirese, jasalma intellekt baǵdarında sistemalı birge islesiwdi kúsheytiw hám onnan paydalanıw etikası boyınsha úlgi qaǵıydalardı islep shıǵıw tiykarǵı áhmiyetke iye. Bul innovaciyalıq huqıqıy tiykar usı tarawdı nátiyjeli tártipke salıwda barlıq mámleketler ushın ózine tán úlgi bolıp xızmet etetuǵını sózsiz.
Forumda mine, usı áhmiyetli táreplerdi ayrıqsha esapqa alıp, eń tiykarǵı máselelerdiń dodalanıwı hám ámeliy usınıs jáne baslamalardıń islep shıǵılıwı sanlı keleshektiń bekkem tiykarın jaratıwda hám sanlı transformaciya jolında jáne bir áhmiyetli qádem boladı, dep isenemen.
Ánjuman sheńberinde birinshi márte Jaslar forumı ótkerilip atırǵanı da dıqqatqa ılayıq. Sebebi bul tarawlardıń rawajlanıwın jas áwladtıń belsene qatnasıwısız kóz aldımızǵa keltirip bolmaydı. Sebebi, jas huqıqtanıwshılardıń innovaciyalıq ideyaların qollap-quwatlaw hám olardı nızam dóretiwshiligi procesine keńnen tartıwda bunday nátiyjeli sóylesiw maydanlarınıń áhmiyeti oǵada úlken.
Mine, usınday iygilikli jumıslarda sizlerge kúsh-ǵayrat, bekkem densawlıq hám jańa tabıslar, Forum jumısına bolsa tabıslar tileymen.

Shavkat Mirziyoev,
Ózbekstan Respublikası Prezidenti