Jaqında Túrkiyanıń Antaliya qalasında «Beygendj» baspasınan belgili qaraqalpaq shayırları Uzaqbay Pirjanov hám onıń ómirlik joldası Shiyrin Xalmuratova poeziyasınan úlgiler jámlengen «Kókte juldızlardıń háwesi kelsin» atamasındaǵı toplam túrk tilinde jarıq kórdi.

Eki belgili shayırdıń qosıqların oqıǵanıńızda kóz aldıńızǵa keń paytaxt elimizdiń aymaǵı elesleydi. Álbette, bul aymaqta qanshadan-qansha qıyınshılıqlar, quwanısh hám shadlıqlar júz bergen. Shayırlardıń tiykarǵı wazıypalarınan biri de usı quwanısh hám qayǵılardı qosıq tili menen, dóretiwshige tán sezimtallıq penen kópshilikke málim etiwi esaplanadı.

Máselen Uzaqbay Pirjanovtıń «Men tuwılǵan jerde» qosıǵında:
Qarlıǵashlar ushar, ushar sharshamas,
Palapanlarına ırısqı izlep.
Búlbiller baǵında sayrap jalıqpas,…
-degen qatarları menen saǵınıshtı hám Watanınıń gózzallıqların sáwlelendirgen. Álbette, tematika tek bunnan ǵana ibarat emes. Ámiwdáryadaǵı sayaxatı haqqında da jazadı. Qıyalındaǵı dúnyanı qosıq qatarlarına alıp ótedi.

Ayrıqsha, hesh tartınbastan óz milleti bolǵan qaraqalpaq xalqı haqqında da sóz etken hám ózligin qorǵaǵan. Sebebi, shayır sol jerde tuwılıp, usı xalıqtıń úrp-ádetleri, Watanınıń adamları haqqında aytqan hám mashqalaların qosıqlarında tilge alǵan.

Shayır Shiyrin Xalmuratova óz zamanınıń eń kórnekli hayal shayırlarınıń biri.
Tolǵan ay súziler aspanda,
Shegirtkeler shırıldamaqta.
Húkim súrer átirapta jımjırtlıq,
Ilham tolı sonsha jarıqlıq.-degen qatarları bul sózimizdi tastıyıqlap beredi. Shayırdıń awıl turmısın, shopanlar ómirin ańlaw qábileti bar. Tábiyattı hám insan muhabbatın aldınǵı orınǵa qoyǵan.
Bileseń be, men ózimdi kók teńizdiń,
Jasıl jaǵasında kórsem deymen…-degen qatarları bunıń ayqın dáliyli.
Haqıyqatlıq, muhabbat, insan, tábiyat, máwsimlik xarakterler shayırdıń qosıqlarında ushırasatuǵın tematikanıń bir bólegi ǵana. Shayır-bir teńiz, dárya, tawsılmas, yoshlı tolqınları-sózleri menen oqıwshını geyde yoshlandıradı, geyde dártke saladı.

Qaraqalpaqstan xabar agentligi