Mámleketimizge sapası kepillenbegen tovarlardıń nızamsız jollar menen alıp kiriliwine qarsı operativ ilaj ótkerildi.

Atap aytqanda, Rossiya Federaciyası hám Qazaqstan Respublikasınan elimizde jumıs alıp barıp atırǵan juwapkershiligi sheklengen jámiyetlerdiń atına jiberilgen tovarlar artılǵan 2 «GAZ» markalı júk avtotransport quralları Tashkent wálayatındaǵı «Yallama» shegara-bajıxana postına «qızıl koridor»ǵa kirip kelgennen soń, olardı tolıq bajıxana tekseriwinen ótkeriw maqsetinde, bajıxana xızmetkeriniń baqlawı astında, belgilengen mánzil bajıxana postına jiberildi.
Biraq, yarım jolda bajıxana xızmetkeri mashinalardı belgilengen mánzilge shekem baqlap barmay, olardı qadaǵalawsız qaldırıp, erkin háreketleniwine tiykar jaratqan.
Bunnan paydalanǵan aydawshılar jónelisti ózgertip, Joqarı Shırshıq rayonında jasawshı, 1966-jılı tuwılǵan puqaranıń úyine barǵan.
Soń Rossiya hám Qazaqstannan kitap, aksessuar hám kiyim-kenshekler arasına jasırıp alıp kelingen, tiyisli hújjetleri bolmaǵan, «Aktovegin,» «Kleksan,» «Remaxsol» sıyaqlı 214 atamadaǵı jámi 52459 dana dári-dármaqlardı júk mashinasına ornatılǵan bajıxana mórin buzbastan úyge túsirip, belgilengen mánzil bajıxana postına qaray jol alǵan waqıtlarında olar Mámleketlik qáwipsizlik xızmeti hám Bajıxana komitetiniń jeke qáwipsizlik basqarması xızmetkerleri tárepinen uslandı.
Sapası kepillenbegen bul dári-dármaqlardıń ulıwma bahası 5 mlrd. 353 mln. sumdı quraytuǵının atap ótiw kerek,
Tergewge shekemgi tekseriw dawamında, házirgi waqıtta shaxsına anıqlıq kirgizilip atırǵan Qazaqstan Respublikası puqarası bul tovarlardı qońsı mámleketten elimizge ótkerip beriwi esabınan júk avtomashinalarınıń aydawshılarına 2000 AQSh dolları wáde etkeni málim boldı.
Házirgi waqıtta júk mashinalarınıń aydawshıları hám dári-dármaqlar túsirilgen Joqarı Shırshıq rayonındaǵı kvartiranıń iyesine Jınayat kodeksiniń 182-statyası 2-bólimi «a» bánti menen jınayat isi qozǵatılıp, tergew háreketleri alıp barılmaqta.
Sonday-aq, xızmet wazıypasın tolıq orınlamay, sırt elden nızamsız alıp kelingen dári quralların júk mashinalarınan túsip qalıwına tiykar jaratqan «Yallama» shegara-bajıxana postı inspektorınıń háreketlerine tergew dawamında huqıqıy baha beriledi.