Prezident Shavkat Mirziyoev 28-may kúni Samarqandqa keldi.

Mámleketimiz basshısı dáslep Imam Buxariy maqbarasın zıyaratladı. Quran oqıldı.
Pútkil islam dúnyasında Imam Buxariydiń húrmeti joqarı, onıń maqbarasın kóriw tilegindegi insanlar kóp. Sonıń ushın zıyaratshılarǵa sharayatlardı keńeytiw maqsetinde bul jerde jańa kompleks qurılmaqta.
Sapar waqtında Prezidentimiz qurılıstıń barısın kózden ótkerdi.
Komplekstiń ulıwma maydanı 44 gektarǵa shekem keńeytilgen. Házirgi kúnde ullı maqbara, 10 mıń adamlıq meshit, 4 minara qurıp pitkerilgen.
Jańa kompleks zıyarat penen birge aǵartıwshılıq, tárbiya, ibrat orayı boladı. Muzey, administraciya, miymanxana hám basqa da xızmet kórsetiw imaratların óz ishine aladı. Sıpalar hám áywan diywallarına “Sahihi Buxariy”den hádisler jazıladı.
Mámleketimiz basshısına komplekste bolajaq sharayatlar haqqında málimleme berildi. Maqbara háwlisi hám qıyabanlarǵa kóbirek terekler egiw zárúr ekenligi aytıldı.

ÓzA