Búgin Oliy Majlis Nızamshılıq palatası janındaǵı Jaslar parlamentiniń jańa quramdaǵı birinshi májilisi bolıp ótti. Oǵan Nızamshılıq palatasınıń basshıları, siyasiy partiyalar frakciyalarınıń basshıları, komitetlerdiń baslıqları qatnastı.

Májiliste Oliy Majlis Nızamshılıq palatası Spikeriniń orınbasarı Rahimjon Hakimov shıǵıp sóylep, búgingi kúnde elimizde jaslardı qollap-quwatlawǵa hár tárepleme itibar qaratılıp atırǵanın atap ótti. Jaslar parlamenti aǵzaların juwapkershilikli wazıypa menen qutlıqlap, olardıń jumısına tabıs tiledi.
Atap ótilgenindey, elimizde jaslardıń huqıqları menen máplerin támiyinlew mámleketlik siyasattıń eń tiykarǵı baǵdarlarınan birine aylandı. Prezidentimizdiń basshılıǵında jaslar siyasatı baǵdarında alıp barılıp atırǵan jumıslar dúnya júzi kóleminde tán alınbaqta. Sonıń ishinde, 2023-jılı Jaslar rawajlanıwı indeksi boyınsha, Ózbekstan jaslar siyasatı tarawında eń tez rawajlanıp atırǵan mámleketlerden biri, dep tán alındı.
Atap ótilgenindey, parlamenttiń hár eki palatasında shólkemlestirilgen Jaslar parlamenti jigit-qızlardıń siyasiy-huqıqıy bilim hám kónlikpelerin arttırıw, olardı nızam dóretiwshiligi procesine tartıwda áhmiyetli orın iyelemekte. Ótken dáwirde jaslardıń jámiyetlik turmıstaǵı qatnasın kúsheytiwge xızmet etetuǵın áhmiyetli institut sıpatında qáliplesti. Bul institut parlament hám jaslar arasında kópir wazıypasın atqarmaqta.
Májiliste 2025-jılǵı Jaslar parlamenti saylawı belsendilik penen ótkeni, onda 9 mıń 531 jas óz kandidaturasın qoyǵanı, saylawlar rayonlıq, wálayatlıq hám respublikalıq basqıshlarda basqıshpa-basqısh ótkerilgeni, olardıń arasınan siyasiy partiyalar tárepinen tańlanǵan 150 aǵzadan ibarat jańa shaqırıq quramı qáliplestirilgeni atap ótildi.
Májiliste shıǵıp sóylegen Jaslar parlamenti aǵzaları jaslar ushın jaratılıp atırǵan imkaniyatlar, atap aytqanda, parlament turmısında jaslardıń qatnasıwınıń keńeyip atırǵanı, siyasiy-huqıqıy processlerde olardıń pikir-usınısları inabatqa alınıp atırǵanın atap ótti. Nızam dóretiwshiligi procesinde, jańa nızamlar hám mámleketlik baǵdarlamalardı úgit-násiyatlawda belsene qatnasıw olardıń aldında turǵan áhmiyetli wazıypalardan ekenin atap ótti.
Ásirese, «Qorshaǵan ortalıqtı qorǵaw hám «jasıl» ekonomika jılı» Mámleketlik baǵdarlamasında belgilengen tiykarǵı wazıypalardıń orınlanıwın támiyinlewde Jaslar parlamentiniń óz ornı bolıwı kerek ekenligi ayrıqsha atap ótildi.
Májiliste Jaslar parlamentiniń baslıǵı, onıń orınbasarları hám komitetlerdiń baslıqları saylandı. Atabek Sobitov III shaqırıq Jaslar parlamentiniń baslıǵı etip saylandı.
Sonıń menen birge, 29-30-may kúnleri Ózbekstan Prezidenti janındaǵı Mámleketlik siyasat hám basqarıw akademiyasında Jaslar parlamenti aǵzaları ushın Oliy Majlis Nızamshılıq palatası deputatlarınıń qatnasıwında nızam dóretiwshiligi, jaslar siyasatı, diplomatiyalıq protokol tiykarları, mediada PR texnologiyalarınan nátiyjeli paydalanıw sıyaqlı áhmiyetli temalarda seminar hám sheberlik sabaqları ótkeriliwi belgilep alındı.
Májilis sońında Jaslar parlamenti aǵzalarına siyasiy-huqıqıy bilim hám kónlikpelerin jáne de bekkemlep, turmısqa izbe-iz engiziw, nızam dóretiwshiligi procesine belsene qatnasıw arqalı parlamentimizdiń keleshektegi haqıyqıy miyrasxorlarına aylanatuǵınına isenim bildirildi.

Muhtarama Komilova, ÓzA