Prezident Donald Tramp hákimshiligi elshixanalarǵa student vizasın beriw ushın ushırasıw belgilewdi toqtatıw boyınsha kórsetpe berdi, dep jazadı VVS.

Diplomatiyalıq wákillerge jiberilgen esletpe nusqasında Mámleketlik xatker Marko Rubio bul qarar «qosımsha reje shıqqanǵa shekem» ámel etetuǵının bildirgen.
Xabarda aytılıwınsha, elshixanalar hám konsullıqlar jumısına úlken unamsız tásir etiwi boljanǵan sociallıq tarmaqta student hám valyuta almastırıw vizasın tekseriw kúsheytiledi. Bul ilaj Tramp Amerikanıń ayırım abıraylı kolledjleri menen kelispey atırǵan bir waqıtqa tuwra keldi.
Bizge belgili, Qurama Shtatlarda oqıwdı qálegen sırt elli student, ádette, rásmiy ruxsatnama alıw ushın óz mámleketindegi Amerika elshixanasında sáwbetten ótedi. Kóplegen bilimlendiriw mákemeleri ishki qárejettiń salmaqlı bólegin qaplawda salıstırmalı qımbat «kontrakt» tóleytuǵın sırt elli studentlerge súyenedi.
Prezident administraciyası universitetler ushın ajıratılatuǵın júzlegen million dollar qarjını muzlatıp qoydı hám sırt elli studentlerdi deportciyalawǵa kiristi. Sonıń menen birge basqa kategoriyalar ushın da mıńlaǵan vizalardı biykar etti.
Ásirese, Garvard universiteti Tramptıń «ǵázebine» ushıraǵan. Ótken háptede bul abıraylı dárgay xalıqaralıq studentlerdi dizimge alıw hám sırt elli izertlewshilerdi qabıllaw imkaniyatınan ayırıldı.

Qaraqalpaqstan xabar agentligi