Orınlarda isbilermenlikti rawajlandırıw, biznes júrgiziwde bar mashqalalardı sheshiw hám jańa imkaniyatlar jaratıw maqsetinde Beruniy rayonında gezektegi ashıqtan-ashıq sóylesiw bolıp ótti.

Rayonda jumıs alıp barıp atırǵan isbilermenler menen bolǵan ushırasıwǵa Beruniy rayonı hákimi I.Xidirov basshılıq etti, – dep maǵlıwmat beredi rayon hákimligi Málimleme xızmeti bólim baslıǵı A.Urazova.

Sóylesiw waqtında Prezidentimiz tárepinen ótkerilgen videoselektor májilisinde isbilermenlikti qollap-quwatlaw baǵdarında berilgen tapsırmalar, jaratılǵan jańa imkaniyatlar hám jeńillikler haqqında hár tárepleme maǵlıwmatlar berildi.
Sóylesiwde mebel qurılısı hám zergerlik baǵdarların rawajlandırıw máselelerine ayrıqsha itibar qaratıldı. Bul tarawlarda biznes ashpaqshı bolǵan puqaralarǵa ámeldegi qosımsha jeńillikler haqqında da tolıq maǵlıwmatlar berildi.
Ilaj dawamında isbilermenler ózlerin qızıqtırǵan sorawlar, mashqalalar hám usınısları menen qatnastı. Olar tárepinen kóterilgen máseleler boyınsha hákimlik hám tiyisli shólkemlerdiń wákilleri menen orınlarda dodalaw ótkerilip, sheshiw ilajları belgilendi. Ayırım máseleler boyınsha óz aldına jumısshı toparlar shólkemlestirilip, múddetli reje tiykarında sheshim tabılatuǵını belgilendi.
Ashıqtan-ashıq sóylesiw isbilermenlerdiń mámleketlik uyımlar menen tikkeley hám nátiyjeli sóylesiw alıp barıwı, orınlarda biznes ortalıǵın jaqsılaw hám jańa jumıs orınların jaratıwda áhmiyetli platformaǵa aylanǵanıp barmaqta.

Qaraqalpaqstan xabar agentligi