Berdaq atındaǵı Qaraqalpaq mámleketlik universitetinde Ózbekstan Respublikası Joqarı bilimlendiriw, ilim hám innovaciyalar ministrligi menen birgelikte press-tur shólkemlestirildi. Ilajda jergilikli ǵalaba xabar qurallarınıń wákilleri, joqarı oqıw orınlarınıń baspasóz xatkerleri hám universitet prorektorları qatnastı.

Press-tur dawamında ǴXQ wákilleri universitette student-jaslar ushın jaratılǵan zamanagóy sharayatlar, atap aytqanda, jańadan qurılǵan hám kapital ońlawdan shıǵarılǵan studentler turaq jayları menen jaqınnan tanıstı. Sonday-aq, studentler ushın jaratılǵan infrastruktura, dem alıw orınları hám dógereklerdiń jumısı haqqında tolıq maǵlıwmat berildi.
Búgingi kúnde universitette 82 bakalavriat tálim baǵdarı boyınsha 27 mıńnan aslam student, 54 magistratura qánigeliginde 823 magistrant bilim almaqta. Al, ilimiy dárejeli professor-okıtıwshılar 453 ti, sonıń ishinde, ilim doktorları sanı 52ni, ilim kandidatları hám filosofiya doktorları sanı bolsa 401di qurap, bul oqıw ornınıń ilimiy potencialı 42,2 procentke jetken.
Studentlerdiń bilim alıwı hám tárbiyası ushın universitette 2 jabıq imarat, 3 ashıq sport maydanshası, barlıq sharayatlarǵa iye bolǵan 9 studentler turaq jayı bolıp, olarda 2700 den aslam studentler jasap kelmekte.
Ilajda atap ótilgenindey, sońǵı jılları joqarı bilimlendiriw mákemelerinde bilim alıp atırǵan jaslarǵa qolaylı, qáwipsiz hám zamanagóy jasaw sharayatların jaratıw boyınsha keń kólemli reformalar ámelge asırılmaqta. Sonıń ishinde, Qaraqalpaq mámleketlik universitetinde de jańa jataqxanalar qurılıp, barları bolsa túp-tiykarınan ońlanbaqta.
Bul press-tur arqalı ǵalaba xabar qurallarınıń wákilleri universitettegi sharayatlarǵa tikkeley gúwa boldı hám studentlerdiń bilimlendiriwdiń sapası, turmıs tárizi hám bos waqıtların mazmunlı ótkeriw imkaniyatları haqqında jámiyetshilikti xabardar etiw imkaniyatına iye boldı.
– Universitetimizde bilim alıw ushın qolaylı sharayatlar jaratılǵan. Jataqxanamızda da barlıq zamanagóy múmkinshilikler bar. Bos waqıtlarımızda hár túrli dóregeklerge qatnasamız. Túrli millet wákilleri menen tatıw jasap birge bilim alıp atırmız. Bilim alıwımız ushın jaratılǵan qolaylı imkaniyatlar ushın basshılarǵa minnetdarshılıq bildiremiz, – deydi Xorezm wálayatınan kelip bilim alıp atırǵan Fizika fakultetiniń 2-kurs studenti Zubayda Yusupova.

Qaraqalpaqstan xabar agentligi