Paytaxtımızda «Oraylıq Aziya – 2050: ulıwma abadanlıq hám turaqlılıqqa qaray» atamasında birinshi regionallıq forsayt-seminar bolıp ótpekte.

Regionnıń bes mámleketiniń wákillerin – mámleketlik uyımlardıń qánigeleri, «aqıl orayları» ekspertleri hám ilimiy jámiyetilik wákillerin birlestirgen forum Oraylıq Aziya keleshegi ushın ulıwma strategiyalıq kózqarastı qáliplestiriwge, regionallıq baslamalardı birgelikte alǵa qoyıw hám ámelge asırıw maqsetinde turaqlı siyasiy-ekspertlik birge islesiwdi jolǵa qoyıwǵa qaratılǵan.
Ilaj Strategiyalıq reformalar agentligi tárepinen Ózbekstan Respublikası Prezidenti janındaǵı Strategiyalıq hám regionlararalıq izertlewler institutı (SRII), Oraylıq Aziya xalıqaralıq institutı hám Qazaqstan Respublikası Strategiyalıq rejelestiriw hám reformalar agentligi menen birgelikte ótkerilmekte.
2050-jılǵa shekemgi demografiya, energetika, klimat, suw, transport integraciyası hám insan kapitalı boyınsha prognozlar ekspertlerdiń dıqqat orayında boldı. Regiondaǵı mámleketler arasında sanaat kooperaciyası hám ekonomikalıq jaqtan bir-birin tolıqtırıp turıw máselelerine ayrıqsha itibar qaratıldı.
SRII direktorınıń birinshi orınbasarı Akramjon Nematovtıń atap ótkenindey, bul seminar Ózbekstannıń Oraylıq Aziya mámleketleri basshılarınıń Másláhát ushırasıwlarına basshılıq etiwi sheńberinde ótkerilmekte. Bul ilaj Ózbekstan basshısı Shavkat Mirziyoevtiń Oraylıq Aziyada uzaq múddetli birge islesiw kún tártibin qáliplestiriw zárúrligi haqqındaǵı baslamasın ámelge asırıwǵa qaratılǵan.
Atap aytqanda, eksperttiń atap ótkenindey, 2024-jıl 9-avgustta Astanada bolıp ótken sammit dawamında Ózbekstan Prezidenti ekspertler jámiyetshiligin regionallıq birge islesiw mexanizmlerin bunnan bılay da jetilistiriw, uzaq múddetli óz-ara baylanıslar kún tártibin ámeliy mazmun menen tolıqtırıw boyınsha konceptuallıq usınıslar islep shıǵıwǵa shaqırdı.
Akramjon Nematovtıń pikirinshe, dúnya siyasatındaǵı ósip baratırǵan hám uzaq múddetli bolıwı kútilip atırǵan turaqsızlıq sharayatında, regionallıq birge islesiwdi bekkemlew hár qashanǵıdan da kóbirek talap etilmekte.
Házirgi waqıtta region jedel transformaciya basqıshınan ótpekte – Oraylıq Aziya mámleketleriniń ekonomikası izbe-iz rawajlanıp barmaqta, olardıń global processlerge qatnasıwı keńeymekte, sonday-aq, regionnıń energetika, transport, suw hám azıq-awqat qáwipsizligin támiyinlewdegi ornı barǵan sayın úlken áhmiyetke iye bolmaqta.
A.Nematovtıń aytıwınsha, házirgi kúnde regionda baqlanıp atırǵan unamlı processler regionnan tısqarı birge islesiwshilerdiń Oraylıq Aziyaǵa bolǵan qızıǵıwshılıǵın arttırmaqta. Bul bolsa, óz gezeginde, regiondı dúnya kúshleri hám jetekshi mámleketlerin ózine tartatuǵın orayǵa aylandırmaqta.
Usı múnásibet penen, qánigeniń pikirinshe, búgin Oraylıq Aziyanıń táǵdirin qolǵa alıw imkaniyatın qoldan jibermew oǵada áhmiyetli. Regionnıń turaqlı rawajlanıwı ushın mámleketlerimizdiń resursların hám ishki imkaniyatların mobilizaciyalawımız kerek. Bunnan tısqarı, regionnan tısqarı qatnasıwshılardıń hár qıylı máplerin muwapıqlastırıw hám olardı unamlı baǵdarǵa baǵdarlaw maqsetinde kúsh-ǵayratlarımızdı birlestiriw de ayrıqsha áhmiyetke iye.
«Keleshekti tek ǵana boljaw emes, al onı joybarlaw zárúr. Regionımızdı 2050-jılı qanday kóriwdi qáleytuǵınımız haqqındaǵı sorawǵa tereń oylap qatnas jasaw zárúr. Anıq strategiyanıń bar ekenligi regionımız aldında turǵan tiykarǵı wazıypalardı sheshiwge resurslardı maqsetli baǵdarlaw imkaniyatın beredi»,- dedi SRII wákili.
A.Nematov qatnasıwshılardıń abıraylı quramı, háreketlerdiń muwapıqlıǵı hám házirgi tendenciyalardı túsiniw uzaq múddetli keleshekte Oraylıq Aziyanı rawajlandırıwdıń ámeliy scenariylerin hár tárepleme dodalaw hám islep shıǵıwǵa imkaniyat jaratatuǵınına isenim bildirdi.
Ilaj Evropa Awqamınıń Ózbekstandaǵı delegaciyasınıń járdeminde ótkerilmekte.

ÓzA