Búgingi kúnde xalıq arasında onkologiyalıq keselliklerdiń aldın alıw hám erte anıqlaw boyınsha bir qatar jumıslar ámelge asırılmaqta. Sonıń ishinde, 2021-jıldan baslap barlıq aymaqlarda 45-65 jastaǵı hayal-qızlar arasında kókirek bezi rak keselliklerin erte anıqlaw boyınsha skrining baslanǵan.

Tórt jıl dawamında «Onko-qadaǵalaw» xanalarında hám mammografiyalıq skrining járdeminde jámi 2 million 179 mıń 928 nawqas tekseriwden ótkerilgen. Jámi 6 mıń 117 kókirek bezi ragi nawqasları anıqlanǵan bolsa, olardıń 4 mıń 404 i keselliktiń erte I hám II basqıshındaǵı nawqaslar bolıp esaplanadı.
Sonday-aq, 1 mıń 394 nawqasta aǵza saqlawshı xirurgiyalıq operaciyalar islengen. Házirgi kúnde respublikada málimleme sistemasına integraciyalanǵan 16 mobil mammograf hám 16 stacionar mammografiya kabinetleri xalıqqa maman xızmet kórsetip kelmekte.
Bul haqqında parlamenttiń tómengi palatasınıń májilisinde aytıp ótildi. Onda Densawlıqtı saqlaw ministri A.Xudoyarovqa jiberilgen «Xalıq arasında onkologiyalıq keselliklerdiń aldın alıw hám erte anıqlaw boyınsha ámelge asırılıp atırǵan jumıslardıń jaǵdayı haqqında»ǵı Nızamshılıq palatasınıń parlamentlik sorawına kelgen juwap kórip shıǵıldı.
Parlament sorawına kelgen juwapta keltiriliwinshe, respublikanıń barlıq 16 onkologiyalıq mákemesi tolıq ońlanıp shıǵarılǵan. Ámeldegi 5 nur terapiya úskeneleriniń sanı 51 ge jetkerilgen. Respublikada 100 ambulator, 650 orınlıq stacionar xızmetine iye eń zamanagóy onkologiya orayınıń imaratı qurılıp, bul jerde xalıqqa qánigelestirilgen medicinalıq járdem kórsetilmekte.
Sonday-aq, mámleketlik-jeke menshik sheriklik tiykarında onkologiyalıq nawqaslarǵa PET/KT tekseriwleri mámleketlik qarjılar esabınan ámelge asırıw jolǵa qoyıldı. Barlıq onkologiya filiallarında immunogistoximiya laboratoriyaları shólkemlestirildi.
Ministrdiń juwabına bola, baslanǵısh buwınǵa maman onkologlardı tayarlaw maqsetinde 2023-2024-oqıw jılında 2 jıllıq klinikalıq ordinatura baǵdarı boyınsha 96 orın ajıratılǵan. Respublikalıq onkologiya orayında 37 klinikalıq ordinator bilim almaqta. Sonday-aq, Ferǵana, Xorezm, Samarqand wálayatları hám Tashkent qalasındaǵı aymaqlararalıq xospislerdiń jumısın tolıq jolǵa qoyıw baǵdarında keń kólemli jumıslar ámelge asırılmaqta.
Májiliste Spiker N.Ismoilovtıń parlamentlik sorawına jeterli juwap berilmegeni, atap aytqanda, sorawda baslanǵısh medicinalıq-sanitariyalıq járdem sistemasında xalıq arasında onkologiyalıq keselliklerdi erte anıqlaw, baslanǵısh hám ekilemshi profilaktika jumısların shólkemlestiriw baǵdarındaǵı jumıslardı jaqsılaw boyınsha kórilip atırǵan ilajlar soralǵanı, biraq buǵan anıq maǵlıwmatlar berilmegeni, aymaqlararalıq xospisler boyınsha da jetkilikli málimleme keltirilmegeni sınǵa alındı.
Dodalawlardan soń Densawlıqtı saqlaw ministiriniń juwabı maǵlıwmat ushın qabıl etildi.

Muhtarama Komilova, ÓzA