Úrgensh qalasındaǵı «Yoshlik» sport kompleksinde matematika boyınsha ótkerilip atırǵan Al-Xorezmiy atındaǵı III xalıqaralıq olimpiadanıń ashılıw máresimi bolıp ótti.

Saltanatlı máresimde Xorezm wálayatı hákiminiń orınbasarı Sanat Salaev shıǵıp sóylep, abıraylı olimpiadanıń xalıqaralıq áhmiyeti hám matematika tarawınıń rawajlanıwındaǵı ornı haqqında cóz etti.
Sonday-aq, ilajda Joqarı bilimlendiriwdi rawajlandırıw izertlew orayı direktorınıń orınbasarı M.Esonov, Ózbekstan Respublikası Ilimler akademiyası V.I.Romanovskiy atındaǵı Matematika institutı direktorınıń orınbasarı A.Xudoyberdiev, Úrgensh mámleketlik universiteti rektorı wazıypasın atqarıwshı S.Xodjaniyazov hám Kaliforniya mámleketlik universiteti professorı, olimpiadanıń tóreshiler kollegiyasınıń baslıǵı Z.Ibragimov ta bul olimpiada jarısı Ózbekstanda úshinshi márte ótkerilip atırǵanı hám studentler óz bilimlerin sınaqtan ótkeriwi ushın jaqsı imkaniyat ekenin atap ótti.
Olimpiadanıń tiykarǵı bellesiwleri 28-29-may kúnleri «Yoshlik» sport kompleksinde bolıp ótedi.
Onda Braziliya, AQSh, Qıtay, Hindstan, Qubla Koreya, Malayziya, Yaponiya, Vetnam, Rossiya, Serbiya, Qırǵızstan, Qazaqstan, Tájikstan, Túrkiya, Túrkmenstan sıyaqlı dúnyanıń jetekshi mámleketleri, sonday-aq, elimizdiń kóplegen joqarı bilimlendiriw mákemelerinen jámi 218 qatnasıwshı matematikanıń eń quramalı jumbaqlarına logikalıq hám dóretiwshilik qatnas penen sheshim izleydi.
Bul xalıqaralıq olimpiadanı ótkeriwden gózlengen tiykarǵı maqset – ullı ata-babalarımızdıń dúnya civilizaciyasınıń rawajlanıwına qosqan úlken úlesin xalıqaralıq kólemde keńnen úgit-násiyatlaw, qábiletli studentlerdiń sırt ellerdegi zamanlasları menen doslıq báseki ortalıǵın jaratıw, jaslardıń matematika pánin tereń úyreniwge qızıǵıwshılıǵın arttırıwdan ibarat.

Axmedjan Shakirov, Behzod Saidov (súwret) ÓzA