Usı jılı 26-may kúni Húrmetli Prezidentimizdiń basshılıǵında ótkerilgen jergilikli sanaattı rawajlandırıwǵa baǵıshlanǵan videoselektor májilisinde, mámleketimiz basshısı tárepinen atap ótilgen máseleler hám alǵa qoyılǵan hár bir baslama elimizdiń ekonomikalıq potencialın bunnan bılay da arttırıwǵa, xalqımızdıń turmıs abadanlıǵın jaqsılawǵa qaratılǵanı menen áhmiyetli bolıp esaplanadı. Ásirese, sonıń ishinde xalıqtı sociallıq qorǵawda jańa jumıs orınların jaratıw hám jergilikli islep shıǵarıwshılardı hár tárepleme qollap-quwatlaw máselesi úlken áhmiyetke iye.
Ózbekstan «Adolat» social-demokratiyalıq partiyasınıń saylawaldı baǵdarlamasınan orın alǵan isbilermenlerdiń huqıqların qorǵaw, mámlekettiń sanaat potencialın arttırıw hám aymaqlardı turaqlı rawajlandırıw sıyaqlı maqsetlerimiz, mámleketimiz basshısı tárepinen belgilep berilgen ilajlarda óz kórinisin tapqanınan oǵada quwanıshlımız. Solardıń arasında, ásirese, bul májiliste Milliy brendlerdi kóbeytiw, barların xalıqaralıq dárejege alıp shıǵıw boyınsha da jańa sistema engiziletuǵını belgilengenligi ayrıqsha áhmiyetke iye
Milliy brendlerdi qollap-quwatlaw kompaniyası shólkemlestirilip, bul kompaniyaǵa bir qatar wazıypalar, sonıń ishinde, sırt elden brend-menedjer, dizayner, marketolog, piar-menedjerlerdi alıp keliw, xalıqaralıq sertifikatqa iye, sapalı hám sırtqı bazarda básekige shıdamlı bolǵan keminde 50 milliy ónimdi tańlap alıw, olarǵa sapa belgisin berip, brendin dúnyaǵa tanıtıw ushın úlken úgit-násiyatlaw kampaniyasın ámelge asırıw wazıypaları júklenip atırǵanı, jergilikli isbilermenlerdiń ónimleri dúnya bazarına shıǵıwına, básekige túsiwine, islep shıǵarıwshılardıń juwapkershiliginiń jáne de artıwına, eksport kóleminiń joqarılawına xızmet etedi.
Úydegi óndiristen sanaat basqıshına ótiw máselesine itibar qaratılıp, jeke tártiptegi isbilermenlerge 5 adamǵa shekem jumısshı alıp, mebel islep shıǵarıwǵa ruxsat berilip atırǵanı, bul jumıstı baslaw, keńeytiw tileginde júrgen jas isbilermenlerge 7 jılǵa 5 milliard sumǵa shekem 18 procentlik kredit ajıratıw sıyaqlı iygilikli baslamalar ortaǵa taslanǵanı, biz jergilikli Keńes deputatların quwandırmaqta.
Sebebi, xalıqtı mine, usınday jańalıqlardan, jaratılıp atırǵan imkaniyatlardan xabardar etiw hám olarǵa huqıqıy járdem kórsetiw tiykarǵı wazıypamız bolıp tabıladı. Aldaǵı waqıtları Prezidentimizdiń bul iygilikli baslamaların qollap-quwatlaw ushın ayanbastan xızmet ete beremiz.

G.Eshmuradova,
Xalıq deputatları Qońırat rayonlıq Keńesiniń deputatı.
Qaraqalpaqstan xabar agentligi