Qaraqalpaqstan Respublikası Transport ministrliginde Transport qadaǵalaw inspekciyası Avtomobil hám suw transportı qadaǵalaw Qaraqalpaqstan Respublikası aymaqlıq bólimi tárepinen usı jıldıń ótken 4 ayı dawamında islengen jumıslarǵa baǵıshlanǵan baspasóz ánjumanı bolıp ótti.

Ánjumanǵa Qaraqalpaqstan Respublikası Transport ministri P.Qayıpbekov, Ózbekstan Respublikası Transport ministrligi janındaǵı Transport qadaǵalaw inspekciyası baslıǵınıń orınbasarı S.Turǵunov hám basqa da juwapker shólkem wákilleri hám ǵalaba xabar qurallarınıń xızmetkerleri qatnastı.
Ilajdı Transport qadaǵalaw inspekciyasınıń Málimleme xızmeti baslıǵı F. Xayriddinov basqarıp bardı.
Onda Ózbekstan Respublikası Transport ministrligi janındaǵı Transport qadaǵalaw inspekciyası baslıǵınıń orınbasarı S.Turǵunov, Qaraqalpaqstan Respublikası Transport ministri P.Qayıpbekov hám Transport qadaǵalaw inspekciyası Avtomobil hám suw transportı qadaǵalaw Qaraqalpaqstan Respublikası aymaqlıq bólimi baslıǵı A.Sadirbekovlar Ózbekstan Respublikası Ministrler Kabinetiniń 2023-jıl 15-dekabrdegi 668-sanlı qararı tiykarında, inspekciyanıń bólimi tárepinen ámelge asırılǵan jumıslar hám Respublika aymaǵında júk avtomobilleriniń salmaq hám gabarit (kólem) parametrlerin qadaǵalaw hám avtomobil tasıwları tarawında huqıqbuzarlıqlar boyınsha alıp barılıp atırǵan qadaǵalaw ilajları haqqında keń túrde aytıp berdi.
– Qaraqalpaqstan Respublikasında jámi 155 jolawshı tasıwshı kárxanalar bolıp, olarda 234 avtobus, 831 mikroavtobus, 1214 jónelisli taksi (Damas), 11 537 jónelissiz taksi transport qurallarında xalıqqa xızmet kórsetip kelmekte,-deydi Ózbekstan Respublikası Transport ministrligi janındaǵı Transport qadaǵalaw inspekciyası baslıǵınıń orınbasarı S.Turǵunov.-Sonday-aq, házirgi waqıtta respublika aymaǵında jámi 5 avtovokzal hám 11 avtostanciya jumıs alıp barmaqta. Sonıń menen birge, aymaqta avtomobil jollarında salmaq hám gabarit parametrleri qadaǵlawı boyınsha 5 zamanagóy ólshew quralları menen úskenelengen stacionar hám kóshpeli shaqapshalar bolıp, sonnan 2 dana stacionar tárezi, 3 kóshpeli táreziler ornatılǵan halda qadaǵalaw ilajların alıp barılmaqta.
Ánjumanda jurnalistler tárepinen ilaj shólkemlestiriwshilerine búgingi kúnde keń jámiyetshilikti qızıqtırǵan máseleler boyınsha sorawlar berilip, olarǵa juwap aldı.
Sońınan ánjuman shólkemlestiriwshileri jurnalistler ushın press-tur shólkemlestirip, onda ǵalaba xabar qurallarına búgingi kúni inspekciya xızmetkerleri tárepinen tarawda alıp barılıp atırǵan jumıslar jóninde keń túrde ámeliy maǵlıwmatlar berildi.
– Transport tarawında sońǵı jılları kóplegen unamlı ózgeris hám jańalanıwlar júz berip atırǵan eken,-deydi Qaraqalpaqstan radiokanalı jurnalisti Ziyada Tajimuratova.- Ótkerilgen ilajdan ózim ushın kóplegen jańa maǵlıwmatlar aldım. Bunıń ushın shólkemlestiriwshilerge úlken raxmet aytaman hám aldaǵı waqıtları da bunnan jaqsı jańalıqlardı kútip qalamız.

Adilbay Orazov,
Qaraqalpaqstan xabar agentligi sholıwshısı